Ish-kryetari i Kuvendit të Kosovës dhe ish-zëdhënësi i UÇK-së, Jakup Krasniqi, ka përfunduar vizitën katërditore në Kosovë dhe pritet të rikthehet gjatë ditës së sotme në Hagë.
Vizita e tij u miratua nga Gjykata Speciale për arsye familjare, pas raportimeve se bashkëshortja e tij kishte probleme shëndetësore.
Gjatë qëndrimit në Kosovë, Krasniqi kaloi disa orë në ditë në banesën e tij në lagjen Velania, në Prishtinë. Ndërkohë, pranë banesës së tij u vendosën forca të sigurisë për të garantuar mbarëvajtjen e vizitës.
Kjo është vizita e dytë e Krasniqit në Kosovë që prej arrestimit dhe dërgimit në paraburgim në Hagë, në vitin 2020. Herën e parë ai ishte lejuar të kthehej në vendlindje për të marrë pjesë në ceremoninë mortore të vëllait të tij.
Krasniqi është dënuar në shkallën e parë nga Dhomat e Specializuara të Kosovës me 25 vite burgim për krime lufte. Procesi gjyqësor ndaj tij zhvillohet në Hagë.