Dr. Gëzim Nebiu është zgjedhur kryetar i Degës së Lidhjes Shqiptare në Kërçovë, në kuadër të Kuvendit zgjedhor ku u zgjodhën edhe organet e reja drejtuese të kësaj dege.
Me mbështetjen unanime të kuvendarëve të pranishëm, Nebiu mori drejtimin e degës, ndërsa në fjalën e tij pas zgjedhjes theksoi se një ndër synimet kryesore të strukturës së re politike do të jetë rikthimi i Komunës së Kërçovës nën drejtimin e shqiptarëve.
Në këtë drejtim u fokusuan edhe mesazhet e përfaqësuesve të tjerë të Lidhjes Shqiptare. Të pranishmit i përshëndeti komandant Qyfa Zylfi Adili, i cili i uroi suksese kryesisë së re
Ndërsa anëtari i Kryesisë Qendrore të Lidhjes Shqiptare, Remzi Mehmedi, gjithashtu vuri theksin te çështja e drejtimit të Komunës së Kërçovës.
Punimet e Kuvendit Zgjedhor të Degës së Kërçovës i ndoqi nga afër edhe kryetari i Lidhjes Shqiptare, Ziadin Sela. Në fjalën e tij, krahas mesazheve politike lidhur me zhvillimet aktuale, Sela u ndal edhe te rëndësia që ka Kërçova për subjektin politik dhe synimi për rikthimin e komunës nën drejtimin shqiptarëve.