TV LIVE Radio
Sport
20 November 2026
David Beckham përgatit një film biografik për legjendën George Best

Kompania e prodhimit të David Beckham, Studio 99, po punon për realizimin e një filmi biografik kushtuar legjendës George Best, një prej futbollistëve më të mëdhenj në historinë e Manchester United dhe futbollit botëror.

Projekti ndodhet ende në fazat e para të zhvillimit, por ideja është që filmi të rrëfejë jetën e jashtëzakonshme të ish-yllit të futbollit irlandez, duke përfshirë sukseset e tij në fushën e lojës, famën e madhe dhe problemet personale që shoqëruan karrierën e tij.

Studio 99, e bashkëthemeluar nga Beckham, është kompania që realizoi dokumentarin me katër episode për jetën e ish-kapitenit të Anglisë në Netflix. Ndërkohë, kompania mëmë Authentic Studios ka prodhuar së fundmi edhe serialin biografik me tetë episode për legjendën e boksit, Muhammad Ali.

Image

Një burim pranë projektit ka zbuluar se kompania e Beckham po bashkon forcat për të sjellë në ekran historinë e Best-it, të cilin e përshkroi si një gjeni të futbollit, por edhe një njeri që kishte betejat e tij personale.

George Best ishte një nga ikonat e Manchester United, ku luajti për 11 vite. Ai debutoi me skuadrën në moshën vetëm 17-vjeçare dhe gjatë kësaj periudhe shënoi 179 gola në 470 ndeshje. Për pesë sezone radhazi u shpall golashënuesi më i mirë i klubit.

I lindur në Belfast të Irlandës së Veriut, Best u bë i famshëm jo vetëm për talentin e jashtëzakonshëm, por edhe për stilin e tij të jetesës dhe famën që e shoqëronte. Për shkak të pamjes dhe popullaritetit të madh, ai u pagëzua me nofkën “Beatle-i i pestë”, në një referencë për grupin legjendar muzikor The Beatles.

Megjithatë, problemet me alkoolin dhe jeta jashtë fushës shpesh e vunë në hije madhështinë e tij sportive. Best ndërroi jetë në vitin 2005, në moshën 59-vjeçare, si pasojë e dështimit të shumë organeve, pas komplikacioneve të lidhura me transplantin e mëlçisë dhe varësinë nga alkooli.

David Beckham, i cili mbajti fanellën me numrin 7 te Manchester United për gjashtë vite, nga viti 1997, ashtu siç kishte bërë dekada më parë edhe Best, e ka vlerësuar gjithmonë paraardhësin e tij.

Pas vdekjes së tij, Beckham e cilësoi Best si një legjendë të futbollit dhe një prej lojtarëve më të mëdhenj që kishte parë ndonjëherë ky sport.

Image



Të ndryshme
Më shumë

Radio Uskana - LIVE