TV LIVE Radio
Sport
18 November 2026
Bushi vlerëson Shqipërinë U-21 pas barazimit me Spanjën: Djemtë dhanë gjithçka, zbatuan në mënyrë perfekte detyrat

Trajneri i Shqipërisë U-21, Alban Bushi, ka vlerësuar paraqitjen e futbollistëve të tij pas barazimit 0-0 ndaj Spanjës, në ndeshjen e zhvilluar në stadiumin “Air Albania”, e vlefshme për kualifikueset e Kampionatit Europian 2027.

Në prononcimin pas takimit, Bushi falënderoi lojtarët, stafin teknik dhe tifozët për mbështetjen, duke theksuar se përballë një kundërshtari të nivelit të Spanjës kërkohet sakrificë maksimale dhe përkushtim në çdo moment të lojës.

“Dua të falënderoj futbollistët, stafin dhe tifozët që na mbështetën. Djemtë vrapuan dhe luftuan shumë. E dinim se ndaj një ekipi si Spanja duhet të japësh edhe pikën e fundit të djersës. Patëm mundësitë tona për të shënuar, por nuk arritëm t'i shfrytëzonim. Ndoshta ndikoi edhe lodhja nga ndeshja me Luksemburgun, sidomos te sulmuesit. Megjithatë, lojtarët dhanë maksimumin dhe zbatuan në mënyrë të përsosur atë që kishim përgatitur në stërvitje”, u shpreh Bushi.

Tekniku kuqezi nënvizoi se Shqipëria arriti ta mbante Spanjën larg zonës së rrezikshme në pjesën më të madhe të takimit, duke kufizuar ndjeshëm mundësitë e kundërshtarit.

Bushi pranoi diferencat në potencialin individual mes dy përfaqësueseve, por theksoi se grupi shqiptar mund t'i kompensojë ato përmes disiplinës, shpirtit luftarak dhe sakrificës kolektive. Ai rikujtoi edhe paraqitjet e mira ndaj Italisë dhe Gjermanisë, pavarësisht rezultateve negative.

Trajneri tregoi se ishte veçanërisht i kënaqur me përkushtimin e lojtarëve, disa prej të cilëve përfunduan ndeshjen me ngërçe muskulore dhe shqetësime fizike për shkak të intensitetit të lartë.

Në fund, Bushi e cilësoi këtë barazim si një rezultat që duhet t'i japë besim skuadrës për vazhdimësinë, duke shpresuar që ndeshjet e muajit mars të zhvillohen sërish në “Air Albania”, me mbështetjen e tifozëve kuqezi.



Të ndryshme
Më shumë

Radio Uskana - LIVE