Një studim i ri shkencor ka zbuluar struktura të pazakonta gjeologjike në Mars, të cilat mund të jenë mbetje të akullnajave të lashta të fshehura nën shtresa shkëmbinjsh dhe pluhuri.
Studiuesit kanë identifikuar 29 depozitime të mundshme akulli në krateret e rajonit Alba Mons, në hemisferën veriore të planetit të kuq. Ajo që i ka habitur shkencëtarët është forma e tyre: akullnajat përfundojnë në skarpa shumë të pjerrëta, me mure që në disa raste arrijnë deri në 209 metra lartësi.

Për të arritur në këto përfundime, ekipi ndërkombëtar ka analizuar imazhe nga sonda Mars Reconnaissance Orbiter e NASA-s dhe ExoMars Trace Gas Orbiter e Agjencisë Evropiane të Hapësirës. Janë shqyrtuar gjithsej 738 kratere, duke përdorur imazhe satelitore dhe modele tredimensionale.

Sipas studiuesve, akulli mund të jetë formuar gjatë një periudhe më të ftohtë në historinë e Marsit dhe më pas është mbuluar nga shkëmbinj e materiale të tjera, të cilat kanë ndihmuar në ruajtjen e tij.

Zbulimi është i rëndësishëm edhe për misionet e ardhshme hapësinore. Nëse prania e akullit konfirmohet, këto zona mund të përbëjnë burime të vlefshme uji për astronautët që do të eksplorojnë planetin në të ardhmen.
Studimi është publikuar në revistën shkencore “Earth and Planetary Science Letters”.
