Sektori për Krime Kompjuterike dhe Forenzikë Digjitale pranë Ministrisë së Punëve të Brendshme ka ngritur kallëzim penal në Prokurorinë Themelore Publike të Manastirit kundër një 56-vjeçareje nga Manastiri dhe një 38-vjeçari nga Estonia, nën dyshimin për kryerjen e veprës penale „mashtrim“, sipas nenit 247 të Kodit Penal.

Në periudhën nga dhjetori i vitit 2025 deri në prill të vitit 2026, përmes një aplikacioni mobil dhe një kanali me disa qindra abonentë, të dyshuarit kanë joshur një numër të madh qytetarësh nga i gjithë vendi që të investonin para në një platformë të rreme online, duke u premtuar fitime që nuk u realizuan asnjëherë. Në këtë mënyrë, qytetarëve u është shkaktuar dëm i konsiderueshëm financiar.

Në Sektorin për Krime Kompjuterike dhe Forenzikë Digjitale janë dorëzuar pesë denoncime nga qytetarë të dëmtuar, të cilët kishin rënë pre e mashtrimit gjatë kësaj periudhe. Megjithatë, sipas të dhënave nga raportet financiare të llogarisë bankare të të dyshuarës së parë, rezulton se në këtë skemë janë dëmtuar qindra qytetarë, shumica prej të cilëve nuk e kanë denoncuar rastin.

Për këtë rast është zhvilluar një hetim disamujor, në të cilin janë përfshirë disa institucione vendore dhe të huaja, me ç’rast janë shkëmbyer informacione që kanë mundësuar zbulimin e identitetit të të dyshuarve.

Gjatë hetimeve, Sektori për Krime Kompjuterike dhe Forenzikë Digjitale ka zhvilluar bisedë informative me të dyshuarën e parë dhe ka sekuestruar pajisjet elektronike që ajo i përdorte për komunikim përmes aplikacionit. Analiza forenzike e të dhënave të nxjerra nga këto pajisje ka siguruar prova për veprën penale për të cilën është ngritur kallëzimi penal.

Sa i përket aspektit ndërkombëtar të hetimit, pas analizës profesionale të transaksioneve me kriptovaluta, përmes platformave ndërkombëtare të sigurisë janë siguruar informacione të plota për pronarin e portofolit të kriptovalutave.

Duke marrë parasysh rritjen e rasteve të këtij lloji të mashtrimeve, Sektori për Krime Kompjuterike dhe Forenzikë Digjitale apelon te qytetarët që të mos u besojnë ofertave për fitime të lehta dhe të shpejta në internet.

Mashtruesit, përmes rrjeteve sociale, profileve të rreme dhe telefonatave, ofrojnë investime në kriptovaluta duke premtuar fitime të larta dhe të sigurta. Më pas, qytetarët i bindin të transferojnë para në platforma të rreme investimi, të cilat në shumë raste mund të duken plotësisht legjitime.