Biblioteka “Linkest” në Manastir vazhdon të jetë një vatër e rëndësishme e ruajtjes së gjuhës shqipe dhe zhvillimit edukativo-kulturor të të rinjve shqiptarë. Përveç mundësisë për të lexuar libra të ndryshëm, të rinjtë në këtë bibliotekë marrin pjesë edhe në aktivitete të shumta edukative dhe kulturore, duke kultivuar dashurinë për librin, gjuhën dhe kulturën shqiptare.

Themeluesja e bibliotekës, Emira Selimi, në një prononcim për TV Uskana, foli për sfidat dhe sakrificat gjatë funksionimit të kësaj vatre kulturore. Ajo u shpreh e zhgënjyer me mbështetjen institucionale, duke theksuar vështirësitë me të cilat përballet biblioteka në përpjekjet për të vazhduar veprimtarinë e saj.

Nga ana tjetër, ajo  theksoi se qytetarët e Kërçovës kanë treguar vazhdimisht interesim dhe gatishmëri për të ndihmuar, në forma të ndryshme, këtë vatër edukative, e cila luan një rol të rëndësishëm për fëmijët shqiptarë të Manastirit.

Pavarësisht sfidave, biblioteka “Linkest” mbetet një hapësirë ku libri, gjuha shqipe dhe aktivitetet kulturore bashkojnë të rinjtë, duke kontribuar në ruajtjen dhe përcjelljen e identitetit kombëtar te brezat e rinj.