Cristiano Ronaldo dhe Lionel Messi mund të bëhen bashkëlojtarë, të paktën për një natë, në një prej ngjarjeve që do të tërhiqte vëmendjen e gjithë botës së futbollit.

Ish-futbollisti argjentinas Carlos Tevez po punon për organizimin e një ndeshjeje lamtumire në stadiumin legjendar “La Bombonera”, në Buenos Aires, ku synon të mbledhë disa prej emrave më të mëdhenj me të cilët ka ndarë fushën gjatë karrierës së tij.

Sipas raportimit të mediumit spanjoll “Marca”, duke iu referuar “Infobae”, ndeshja është planifikuar të zhvillohet më 20 dhjetor 2026, ndërsa ideja e Tevezit është që Messi dhe Ronaldo të luajnë në të njëjtën skuadër.

Megjithatë, pjesëmarrja e dy superyjeve nuk është konfirmuar zyrtarisht.

Tevez, i cili i dha fund karrierës si futbollist në vitin 2022, ka treguar se po përpiqet ta realizojë këtë ide, duke zbuluar edhe disa prej emrave që dëshiron t’i ketë në këtë ndeshje të veçantë.

Në listën e përmendur prej tij janë portierët Gianluigi Buffon dhe Edwin van der Sar, mbrojtësit Rio Ferdinand, Nemanja Vidić, Giorgio Chiellini dhe Leonardo Bonucci, si dhe mesfushorët Andrea Pirlo, Paul Scholes dhe Juan Román Riquelme.

“Do ta gjej vetë Cristianon”, ka thënë Tevez, duke folur për mundësinë e bashkimit të Ronaldos me Messin në këtë ngjarje.

Argjentinasi ka arsye të veçantë për ta realizuar këtë ide. Ai ka luajtur 47 ndeshje me Messin në përfaqësuesen e Argjentinës, ndërsa me Ronaldon ishte bashkëlojtar te Manchester United.

Nëse projekti realizohet dhe dy yjet pranojnë ftesën, futbolli mund të përjetojë një pamje që tifozët e kanë ëndërruar për më shumë se dy dekada: Messin dhe Ronaldon me të njëjtën fanellë, përballë publikut në “La Bombonera”.

Për momentin, gjithçka mbetet në fazën e planifikimit, por ideja e Tevezit tashmë premton një spektakël të jashtëzakonshëm.