Lideri i BDI-së, Ali Ahmeti, ka kujtuar sot ngjarjen historike të 6 tetorit 1968, kur në Prizren flamuri kombëtar shqiptar u valëvit hapur, duke u shndërruar në një nga momentet më të fuqishme të zgjimit kombëtar të asaj kohe.

Ahmeti theksoi se pas këtij akti simbolik, demonstratat u përhapën në shumë qytete të Kosovës dhe në viset e tjera shqiptare, duke e kthyer flamurin kuqezi në simbol të kërkesës për barazi, dinjitet, gjuhë, identitet dhe liri.

Ai kujtoi se për flamurin u përndoqën, u burgosën dhe u dënuan me vite të shumta burg shumë shqiptarë, mes tyre edhe patrioti Fazli Grajçevci, ndërsa breza të tërë paguan shtrenjtë guximin për ta mbajtur flamurin të lirë.

“Por as arrestimet, as burgjet, as dënimet me shekuj burg, as dhuna e përndjekjet nuk mundën ta ndalin simbolin që për shqiptarët mbart kujtesën e sakrificës, krenarisë dhe qëndresës së pathyeshme kombëtare,” u shpreh Ahmeti.

Ai shtoi se nën flamurin kuqezi u frymëzuan breza të tërë shqiptarësh patriotë, deri te themeluesit dhe ushtarët e Ushtrisë Çlirimtare të Kosovës dhe Ushtrisë Çlirimtare Kombëtare, që morën armët për lirinë e popullit të tyre.

“Flamuri kuqezi nuk është vetëm një simbol që valëvitet në erë. Është historia jonë, sakrifica jonë dhe kujtesa jonë kolektive. Është flamuri nën të cilin breza të shqiptarëve e kanë ruajtur identitetin dhe kanë luftuar për lirinë,” përfundoi Ahmeti. përcjell  Zhurnal.mk .