Presidentja e Komisionit Evropian, Ursula von der Leyen, paralajmëroi se që javën e ardhshme duhet të ndërmerret një hap i ri në përpjekjen për zhbllokimin e procesit të integrimit evropian të Maqedonisë së Veriut. Në konferencën e përbashkët për shtyp me kryeministrin Hristijan Mickoski në Shkup, ajo tha se në takimin e sotëm është dakorduar që procesi të fillojë sërish të lëvizë, raporton Portalb.mk.

“U dakorduam që të kemi një hap të parë të ri javën e ardhshme dhe të përpiqemi ta zhbllokojmë procesin dhe, në fakt, ta shndërrojmë atë në një proces. Kjo është pjesa më e rëndësishme”, deklaroi Von der Leyen.

Ajo vlerësoi se Maqedonia e Veriut mund të përparojë shpejt pasi të tejkalohet bllokada aktuale, duke iu referuar reformave të zbatuara deri më tani.

“Në momentin kur ta zhbllokojmë situatën këtu, mendimi im personal është se mund të jemi shumë të shpejtë me Maqedoninë e Veriut, sepse tashmë po punojmë intensivisht në reformat që janë të nevojshme. Po, ende ka punë, por është mbresëlënëse ajo që keni bërë deri tani”, tha presidentja e Komisionit Evropian.

Von der Leyen shpjegoi se udhërrëfyesit për anëtarësim aktualisht u referohen shteteve që tashmë kanë avancuar më thellë në negociata dhe hapin e mbyllin kapitujt. Sipas saj, pas zhbllokimit të procesit të Maqedonisë së Veriut do të mund të fillojë edhe përgatitja e udhërrëfyesve për vendin.

Në fjalimin e saj, ajo dërgoi mesazh edhe sa i përket identitetit dhe gjuhës maqedonase.

“Ne do ta mirëpresim Maqedoninë e Veriut me identitetin e saj dhe me gjuhën e saj. Besojmë se kultura maqedonase dhe gjuha maqedonase mund ta bëjnë Unionin tonë më të pasur”, deklaroi Von der Leyen.

Ajo theksoi se negociatat e anëtarësimit kanë nisur në vitin 2022, ndërsa procesi i skriningut është përfunduar për më pak se një vit, duke shtuar se tani mbetet hapi kyç i nevojshëm për hapjen e klasterit të parë “Themeloret”. Komisioni Evropian thekson se konferenca ndërqeveritare për negociatat e anëtarësimit me Maqedoninë e Veriut u mbajt në korrik të vitit 2022, ndërsa skriningu u përfundua në dhjetor të vitit 2023.

“Përgatiteni, edhe ne përgatitetmi sepse zgjerimi është proces i dyanshëm. Prandaj e paraqesim politikën tonë për aderim. Duam të sigurohemi se BE duhet bëhet më i madh dhe të shohim se si ta bëjmë më mirë në esencë Evropën. I nderuar Hristijan, nuk do të futem në detaje, por mund të shihni se ky është një moment i ri në rajon. Ne dëshirojmë që t’i fusim njerëzit e Maqedonisë në BE”, tha Leyen.

Paraprakisht, kryeministri Hristijan Mickoski theksoi se Maqedonia kërkon proces që të jetë fer dhe i bazuar në rregulla të qarta.

“Ne i kryejmë detyrat tona, zbatojmë reforma që priten nga një vend, ndonjëherë në kohë, ndonjëherë vonohemi, por megjithatë i zbatojmë si vend që dëshiron të futet në BE”, tha Mickoski.

Lidhur me marrëdhëniet me Bullgarinë, Mickoski tha se presin që të jetë e përfshirë edhe BE në këtë proces që të ndihmojë që të gjendet zgjidhje evropiane, që e dakorduara të jetë e qartë, detyrimet të vlejnë për të gjithë, “ndërsa procesi qasës të mos jetë i hapur përsëri për kushtëzim dypalësh”.

“Çdo zgjidhje duhet të japë siguri, e jo hapësirë për kërkesa të reja”, tha Mickoski.

Von der Leyen do të zhvillojë takime edhe me presidenten Gordana Siljanovska-Davkova pas së cilës do të vizitojë projektin e financuar nga BE-ja për hekurudhën e Korridorit VIII, së bashku me kryeministrin Hristijan Mickoski dhe zëvendëskryeministrin dhe ministrin e Transportit, Aleksandar Nikoloski.

Me vizitën në Shkup, Von der Leyen e përfundon turneun e këtij viti nëpër vendet e Ballkanit Perëndimor. Gjatë ditëve të fundit ajo vizitoi Shqipërinë, Kosovën dhe Malin e Zi. Shefja e Komisionit Evropian këtë herë i anashkaloi Serbinë dhe Bosnjë e Hercegovinën për shkak të zgjedhjeve të ardhshme në këto dy vende.

Me rastin e kësaj vizite, sot ka regjim të veçantë trafiku në qendër të Shkupit, njoftoi Ministria e Punëve të Brendshme (MPB). Regjimi i trafikut do të zbatohet në rrugët në zonën më të gjerë qendrore. Ministria e Punëve të Brendshme u bën thirrje shoferëve të zbatojnë urdhrat e oficerëve të policisë.

Bashkimi Evropian po zhvillon plane veprimi, sipas të cilave katër vendet që janë më pranë anëtarësimit në bllok do të marrin një rrugë të qartë dhe të detajuar drejt anëtarësimit. Në këtë plan nuk bën pjesë Maqedonia e Veriut.