Shkolla Fillore “Naim Frashëri” zhvillon procesin edukativo-mësimor në kushte të mira në të dy objektet shkollore, atë qendror në fshatin Jagoll dhe shkollën periferike në Tuhin. Megjithatë, shqetësim mbetet numri i ulët i nxënësve që ndjekin mësimin në këtë shkollë.
Drejtori i SHF “Naim Frashëri”, Ismet Selimi, njofton se aktualisht në të dy objektet shkollore mësimin e ndjekin gjithsej 54 nxënës, ndërsa këtë vit në klasën e parë janë regjistruar vetëm katër nxënës.
Sipas drejtorit Selimi, viti i ri shkollor ka nisur në kohë dhe pa probleme, ndërsa nxënësve u janë siguruar edhe tekstet shkollore të ndara nga Ministria e Arsimit dhe Shkencës. Gjithashtu, përmes donatorëve të ndryshëm janë siguruar edhe mjete të tjera të nevojshme për nxënësit për zhvillimin e procesit mësimor.
Drejtori thekson se procesi edukativo-arsimor po zhvillohet në kushte normale dhe se është siguruar edhe transporti për nxënësit. Megjithatë, ai vlerëson se numri i vogël i nxënësve mbetet një nga shqetësimet kryesore për të ardhmen e kësaj shkolle.