Zgjedhjet në Meklenburg-Pomeraninë Perëndimore dhe Berlin kanë tronditur qeverinë gjermane, duke shtuar ndjeshëm presionin ndaj saj.

AfD-ja e ekstremit të djathtë siguroi fitore në Meklenburg-Pomerani, ndërsa në kryeqytet fitoi kandidatja e partisë e Majta. Fill pas votimeve në dy lande, Friedrich Merz doli para kamerave, ai pranoi se rezultati i CDU “ishte katastrofë”, por la të kuptohet se do të vazhdojë të mbetet kancelar, ndërsa ekzekutivi i tij do të vijojë kursin e reformave.

“Përgjigja duhet të jetë ta bëjmë vendin tonë të gatshëm dhe të fortë për të ardhmen. E marr përsipër këtë përgjegjësi, sepse dua ta çoj këtë vend përpara”, shprehet Friedrich Merz, kancelar i Gjermanisë.

Anëtarët e AfD-së nga ana tjetër, nuk u treguan aspak modest në vlerësimin e rezultatit zgjedhor.

“Para së gjithash, duhet thënë se ky rezultat është vërtet spektakolar. Kemi marrë 20 për qind më shumë se në zgjedhjet e fundit. Kemi një mandat të qartë për ta qeverisur këtë land. Jemi forca më e madhe këtu. Hapi i radhës, sigurisht, do të jetë të shohim se cili do të jetë rezultati i zgjedhjeve të përgjithshme”, tha Enrico Komning, AfD.

Në Meklenburg-Pomeraninë Perëndimore, AfD-ja doli e para me 38,2 për qind të votave, ndërsa SPD-ja e kryeministres së landit, Manuela Schëesig, mori 35,5 për qind. Megjithëse AfD-ja fitoi zgjedhjet, SPD-ja mund të vazhdojë të qeverisë, pasi partitë e tjera nuk kanë shprehur gatishmëri për të formuar koalicion me ekstremin e djathte. Rezultati ishte veçanërisht i dobët për CDU-në, e cila mori 4,9 për qind dhe mbeti jashtë parlamentit të landit, për herë të parë në historinë e Republikës Federale të Gjermanisë.

Në Berlin, Die Linke doli forcë e parë me 25,7 për qind, e udhëhequr nga kandidatja Elif Eralp, duke më shumë se dyfishuar rezultatin e saj. Fushata e saj u përqendrua kryesisht te strehimi dhe kufizimi i rritjes së qirave. CDU-ja u rendit e dyta me 18,8 për qind, një rënie e ndjeshme krahasuar me 2023-shin.