Një tjetër sukses i një të reje nga Kërçova në arenën akademike ndërkombëtare. Saranda Bekteshi këtë vit akademik nis angazhimin e saj si profesoreshë në Hasselt University në Belgjikë.
Lajmin e ka bërë të ditur përmes një postimi në Facebook babai i saj, Medin Bekteshi, i cili shprehet i lumtur dhe krenar për arritjen e vajzës së tij.
Në postimin e tij, Bekteshi shkruan se gjithmonë ka besuar se Saranda do t’ia dilte, duke theksuar se puna, përkushtimi dhe dija shpërblehen në një shoqëri ku vlerat dhe meritokracia janë themel i zhvillimit.
“E ndjeja dhe besoja se do t’ia dilje, Saranda, dhe ashtu ndodhi”, shkruan ai, duke i uruar vajzës së tij shëndet dhe suksese të reja në rrugëtimin akademik dhe profesional.
Ai thekson gjithashtu se e gjithë familja është pafundësisht krenare për Sarandën dhe se ajo do të ketë gjithmonë mbështetjen, dashurinë dhe lutjet e prindërve të saj.
Angazhimi i Saranda Bekteshit në një universitet belg përbën një arritje të rëndësishme në karrierën e saj akademike dhe një tjetër shembull të të rinjve shqiptarë që ndërtojnë karrierë në institucione prestigjioze jashtë vendit.