Atleti i Klubit të Atletikës „Uskana“ nga Kërçova, Eltion Vejseli, ka shënuar një sukses të rëndësishëm në Kupën e Maqedonisë për pionerë U16.
Vejseli ka fituar vendin e parë në disiplinën 800 metra, duke e përfunduar garën me kohën 2 minuta, 19 sekonda e 57 të qindtat.
Rezultati i arritur nga atleti i ri është veçanërisht domethënës edhe për shkak të përmirësimit të madh në performancën e tij. Në Kampionatin e Maqedonisë, të zhvilluar më 30 maj, Vejseli kishte regjistruar kohën 2:38.25, ndërsa në garën e 6 shtatorit zbriti kohën në 2:19.57, duke përmirësuar rezultatin për afro 19 sekonda.
Nga Klubi i Atletikës „Uskana“ vlerësojnë se ky rezultat është rezultat i talentit, përkushtimit dhe punës së vazhdueshme të atletit, por edhe i angazhimit të trajnerit Muxhahid Mislimi.
Sipas klubit, një rol të rëndësishëm në përgatitjen e Vejselit ka pasur edhe Shkolla Verore e Atletikës, ku atleti i ri ka punuar intensivisht me trajnerin Mislimi në zhvillimin dhe përmirësimin e performancës së tij.
Suksesi i Eltion Vejselit përbën një tjetër rezultat pozitiv për atletikën kërçovare dhe për punën me gjeneratat e reja në kuadër të KA „Uskana“.