Në stendën gjigante të Xiaomi në IFA 2026, Geek Room dhe Neptun shpenzuan kohën më të madhe para Xiaomi 18 Fold. Smartphone-i i palosshëm u shfaq për herë të parë fizikisht në Evropë, në një ngjyrë të kuqe cherry red, duke konfirmuar qasjen e Xiaomi për një formë më të gjerë dhe më të afërt me një smartphone tradicional.

Por risia më e madhe fshihet brenda. Xiaomi 18 Fold do të jetë smartphone-i i parë komercial i kompanisë që përdor procesorin e saj XRing O3, një hap i rëndësishëm në strategjinë e Xiaomi për të zhvilluar gjithnjë e më shumë komponentë në mënyrë të pavarur. Procesori shoqërohet me memorien e gjeneratës së re LPDDR6, të zhvilluar nga CXMT, me shpejtësi transferimi deri në 12,800 Mbps.

Edhe kamera duket se do të jetë një prej pikave kryesore të këtij modeli. Sistemi i pasmë përbëhet nga tre kamera të zhvilluara në bashkëpunim me Leica, me një sensor kryesor 200MP, telefoto 50MP me zoom optik 3.5x dhe një kamerë ultrawide 50MP. Xiaomi ka publikuar gjithashtu imazhet e para të realizuara me pajisjen, ku bie në sy një trajtim më natyral i fotografisë në dritë të ulët, pa ndriçuar artificialisht hijet.

Nga afër, dizajni konfirmon një ekran të jashtëm me raport më të gjerë, një trend që po fiton terren te telefonat foldable. Pavarësisht mekanizmit të palosjes dhe harduerit të fuqishëm, Xiaomi ka synuar një profil relativisht elegant dhe praktik për përdorim të përditshëm.

Xiaomi 18 Fold ishte gjithashtu qendra e ekspozitës më të madhe të kompanisë në Evropë deri tani, me mbi 3,300 metra katrorë hapësirë dhe më shumë se 380 pajisje të ndërlidhura në ekosistemin “Human x Car x Home”.

Pajisja pritet të prezantohet zyrtarisht në Kinë më 7 shtator, ku Xiaomi do të zbulojë specifikat e plota, variantet e memories dhe detajet mbi disponueshmërinë ndërkombëtare. Nëse ajo që pamë në Berlin është një tregues, Xiaomi 18 Fold synon të jetë një prej foldable-ve më ambiciozë të kompanisë deri më tani.