Në kuadër të 10-vjetorit të shenjtërimit të Nënë Terezës, Drejtoria e Përgjithshme e Arkivave (DPA) paraqiti për herë të parë për publikun një ekspozitë me dokumente mbi vizitën e nobelistes në Tiranë, në gusht 1989.

Në këtë aktivitet të zhvilluar në Auditor ishin të pranishëm ambasadori i Republikës së Kosovës në Shqipëri, Skënder Durmishi, përfaqësuesja e trupit diplomatik të Maqedonisë së Veriut, Radmila Stojmirovska, të dërguarit e komuniteteve fetare në vend dhe të misionit bamirës “Motrat e Nënë Terezës”.

Në fjalën e tij përshëndetëse, ambasadori Durmishi e vlerësoi ekspozitën, si një nismë të rëndësishme për të nxjerrë mësime nga angazhimi humanitar i Nënë Terezës.

Recently Spotted Asteroid Set for Near Miss With EarthKeep Watching

“Faleminderit që e bëtë ambasadën e Republikës së Kosovës në Shqipëri pjesë të këtij aktiviteti. Kam fjalët më të mira për nismën për organizimin e ekspozitën në përvjetorin e shenjtërimit të Nënë Terezës. Hapja e ekspozitës me fotografi dhe dokumente origjinale nga jeta dhe veprimtaria e Nënë Terezës është një ngjarje me vlerë. Duke nderuar Nënë Terezën, nderojmë veprën e saj humaniste dhe vlerat, me të cilat u bë simbol dhe inspirim. Me këtë ekspozitë kujtojmë një pjesë të udhëtimit shpirtëror të Nënë Terezës në misionin e saj të paqes, që zë fill nga Kosova, kur në moshën 12-vjeçare pati thirrjen epifanike”, tha Durmishi.

Në fjalën e saj Stojmirovska theksoi se Nënë Tereza nuk i përket vetëm Shkupit, Shqipërisë apo Indisë, por mbarë njerëzimit falë misionit të saj të vyer humanitar.

“Historia e saj, pra, krijon një urë të jashtëzakonshme njerëzore dhe kulturore nga Shkupi, përmes trashëgimisë së saj shqiptare, drejt Indisë, dhe sot, këtu në Tiranë”, u shpreh përfaqësuesja e ambasadës maqedonase.

Ndërkaq, anëtarja e Komitetit Shtetëror të Kulteve, Erinda Jova vuri në dukje se dokumentet arkivore të paraqitura janë dëshmi të lidhjes së Shën Nënë Terezës me vendorigjinën.

“Është veçanërisht domethënëse që sot kemi mundësinë të shohim dorëshkrimet e Nënë Terezës. Ato nuk janë vetëm dokumente arkivore, janë dëshmi të gjalla të lidhjes së saj me origjinën, gjurmët dhe identitetin shqiptar”, tha Jova.

Mes dokumenteve origjinale që u paraqitën në ekspozitë, bënin pjesë artikuj të publikuar në shtypin e kohës për vizitën e parë të Nënë Terezës në Tiranë në gusht 1989, revista kulturore me poezi kushtuar shenjtores, procesverbali i takimit me Kryetarin e Presidiumit të Kuvendit Popullor Ramiz Alia, si edhe dorëshkrimi një letre të vitit 1979 për popullin shqiptar.

Në përfundim të aktivitetit, të pranishmit u njohën edhe me një instalacion që evidentonte shtrirjen gjeografike të jetës dhe të angazhimit të mirëbërëses, nga Shkupi ku pa dritën për herë të parë e deri në Kalkutë, ku u shua më 5 shtator 1997. A.K./TemA