Bumi global i Inteligjencës Artificiale po ushtron presion mbi tregun e pajisjeve elektronike, duke sjellë rritje të çmimeve për smartfonët, laptopët, kompjuterët dhe konsolat e lojërave.

Kërkesa në rritje për çipa të avancuar nga qendrat e të dhënave që përdoren për zhvillimin dhe funksionimin e sistemeve të IA-së po orienton një pjesë të madhe të kapaciteteve prodhuese drejt këtij sektori. Si pasojë, komponentë të rëndësishëm, veçanërisht procesorët dhe modulet e memories me shpejtësi të lartë, po bëhen më të kushtueshëm dhe më të vështirë për t’u siguruar.

Sipas një analize të kompanisë së kërkimeve të tregut, e publikuar në kuadër të panairit ndërkombëtar të teknologjisë IFA, ndikimi i kësaj situate po ndihet gjithnjë e më shumë te konsumatorët.

Një prej shembujve është Apple, e cila në qershor njoftoi për rritje çmimesh, duke iu referuar kostove më të larta të çipave. Se në çfarë mase do të ndikohen konsumatorët pritet të bëhet më e qartë me prezantimin e modeleve të reja të iPhone.

Edhe kompani të tjera të mëdha, përfshirë HP, Dell dhe Nintendo, kanë rritur çmimet e produkteve të tyre.

Në Gjermani, Shoqata e Industrisë Digjitale Bitkom parashikon se çmimi mesatar i një smartfoni gjatë këtij viti do të arrijë në rreth 646 euro.

Modelet e lira po bëhen më të rralla

Përballë mungesës së disa komponentëve, prodhuesit po ndryshojnë strategjitë e tyre. Kompanitë po përqendrohen te konfigurimet më të kërkuara, veçanërisht ato me 256 ose 512 GB memorie, ndërsa po reduktojnë numrin e varianteve të disponueshme.

Kjo pritet të ndikojë veçanërisht te pajisjet e kategorisë së lirë, të cilat mund të bëhen më të rralla ose të kushtojnë më shumë.

Eksperti i industrisë nga NIQ, Alexander Dehmel, thotë se nuk pritet një krizë e përgjithshme furnizimi e ngjashme me atë të vitit 2020. Megjithatë, ai paralajmëron se konsumatorët duhet të përgatiten për rritje të ndjeshme të çmimeve.

Sipas tij, problemi nuk pritet të sjellë ndërprerje të përgjithshme të furnizimit, por disa konfigurime me fuqi të lartë përpunuese dhe kapacitete të mëdha memorieje mund të bëhen më të shtrenjta ose të kërkojnë kohë më të gjatë për t’u siguruar.

Në këtë mënyrë, bumi i Inteligjencës Artificiale nuk po ndikon vetëm te kompanitë që zhvillojnë teknologjitë e IA-së, por po fillon të ndihet edhe drejtpërdrejt në xhepin e konsumatorëve që kërkojnë të blejnë pajisje të reja elektronike.