Xhamia në Wil të Zvicrës do të jetë më 5 shtator nikoqire e një takimi me mërgatën, ku të ftuar janë zëvendëskryeministri i parë dhe ministri për Çështje Evropiane, Bekim Sali, si dhe deputetja Imerlije Saliu.

Aktiviteti është prezantuar me sloganin “Bashkë ia Vlen”, ndërsa të dy të ftuarit janë pjesë e strukturave politike të koalicionit VLEN. Pikërisht kjo ka ngritur pikëpyetje nëse hapësirat e një objekti fetar po përdoren për një aktivitet që, pavarësisht se si cilësohet nga organizatorët, ka një dimension të dukshëm politik.

TV Uskana iu drejtua Xhamisë Wil me disa pyetje, duke kërkuar sqarime se përse është zgjedhur pikërisht xhamia për këtë takim, nëse aktiviteti ka karakter politik dhe nëse një organizim i tillë rrezikon karakterin fetar dhe jopartiak të institucionit fetar.

Nga Xhamia Wil mohojnë se bëhet fjalë për aktivitet partiak. Sipas tyre, Bekim Sali dhe Imerlije Saliu nuk janë ftuar si përfaqësues të VLEN-it apo të ndonjë partie politike, por në cilësinë e tyre si përfaqësues të institucioneve shtetërore.

“Xhamia Wil nuk lejon fushatë zgjedhore, propagandë apo promovim partiak”, thuhet në përgjigjen e tyre, ndërsa takimi, sipas kryesisë së xhamisë, synon t'u mundësojë pjesëtarëve të mërgatës t'u parashtrojnë pyetje dhe shqetësime përfaqësuesve institucionalë.

Megjithatë, mbetet e diskutueshme nëse një takim i tillë mund të ndahet plotësisht nga dimensioni politik, sidomos kur në materialin zyrtar të aktivitetit përdoret slogani “Bashkë ia Vlen”, i cili lidhet me koalicionin VLEN, ndërsa në takim marrin pjesë pikërisht dy përfaqësues të këtij koalicioni.

Kjo e bën të arsyeshme pyetjen nëse kemi të bëjmë vetëm me një takim institucional me mërgatën, apo me një aktivitet që, pavarësisht përshkrimit zyrtar, krijon edhe një perceptim të qartë politik.

Nga Xhamia Wil thonë se kanë pritur edhe më herët përfaqësues të institucioneve shtetërore dhe diplomatikë, si dhe bashkëpunimin me Ambasadën e Maqedonisë së Veriut për ofrimin e shërbimeve konsullore.

Kryesia e xhamisë thekson se vendimi për organizimin e takimit është marrë nga vetë ajo, në konsultim me strukturat e brendshme, duke vlerësuar karakterin institucional të aktivitetit dhe interesin e komunitetit.

“Xhamia Wil nuk është dhe nuk do të bëhet hapësirë për fushata apo interesa partiake”, thuhet në përgjigjen e tyre.

Por një tjetër element mbetet pa përgjigje.

TV Uskana i ka drejtuar pyetje edhe deputetes Imerlije Saliu, lidhur me pjesëmarrjen e saj në këtë aktivitet. Deri në publikimin e këtij lajmi, nga deputetja nuk kemi marrë përgjigje.

Në një kohë kur hapësirat fetare synohet të mbeten jashtë garës dhe propagandës partiake, rasti i Xhamisë Wil hap një debat më të gjerë: a mjafton që një aktivitet të quhet “institucional” për të mos u konsideruar politik, kur në të marrin pjesë figura të një koalicioni politik dhe aktiviteti promovohet me sloganin e tij?

Ky është një debat që tashmë nuk lidhet vetëm me një aktivitet në Wil, por edhe me vijën ndarëse ndërmjet institucioneve fetare, komunitetit dhe politikës.

TV Uskana ka kontaktuar edhe me deputetë të opozitës për të verifikuar nëse ata janë ftuar në këtë takim. Nga përgjigjet e tyre rezulton se ata nuk kanë marrë asnjë ftesë për të marrë pjesë në aktivitet.

Ky fakt ngre edhe më shumë pikëpyetje rreth karakterit të takimit. Nga njëra anë, Xhamia Wil thotë se bëhet fjalë për një dialog institucional me mërgatën, pa karakter partiak, ndërsa nga ana tjetër, në aktivitet janë ftuar dy përfaqësues të koalicionit VLEN, aktiviteti mban sloganin “Bashkë ia Vlen”, ndërsa deputetë të opozitës deklarojnë se nuk janë ftuar.

Për këtë arsye, mbetet e hapur pyetja nëse bëhet fjalë vërtet për një takim institucional me përfaqësues të shtetit, apo për një aktivitet me karakter politik, i zhvilluar brenda një hapësire fetare.

Nëse qëllimi ka qenë që mërgata të ketë mundësi të dialogojë me përfaqësuesit e institucioneve të shtetit, atëherë lind natyrshëm pyetja: pse përfaqësuesit institucionalë nga opozita nuk janë përfshirë në këtë dialog?