Pas protestës së zhvilluar sot në Prishtinë, Asociacioni i Komunave të Kosovës do të ia adresojnë Qeverisë kërkesat e nivelit lokal, transmeton Gazeta Metro.

Kryetari i Asociacionit, Sazan Ibrahimi, tha se komunat nuk synojnë trajtim të veçantë, por kërkojnë që të respektohen të drejtat dhe përgjegjësitë që u garantohen me ligj

Në mesin e çështjeve që pushteti lokal kërkon të zgjidhen është mbulimi financiar i detyrimeve që kanë dalë nga kontratat kolektive, si dhe pagesat retroaktive për përvojën e punës, të cilat kërkohet të përballohen nga buxheti i nivelit qendror.

Një tjetër pikë lidhet me sektorin e arsimit. Komunat kërkojnë rishikimin e grantit për arsim dhe sigurimin e financimit për më shumë se 3,100 mësimdhënës.

Po ashtu, Asociacioni kërkon që të ndalet centralizimi dhe cenimi i kompetencave që u takojnë komunave, duke kërkuar njëkohësisht përgjegjësi për humbjen e fondeve të Bashkimit Evropian dhe zvogëlimin e grantit të performancës. Kërkesë tjetër është kompensimi i dëmeve të shkaktuara nga vërshimet dhe fatkeqësitë e tjera natyrore që nga viti 2022. Ndërkohë, komunat kërkojnë edhe krijimin e një granti të katërt, i cili do të shërbente për financimin e projekteve kapitale.

Kërkesat e komunave: Kompensimi i obligimeve nga kontratat kolektive, Mbulimi nga buxheti qendror i pagesave retroaktive për përvojën e punës, Rishikimi i grantit për arsim dhe financimi i mbi 3,100 mësimdhënësve, Ndalimi i centralizimit dhe cenimit të kompetencave komunale, Përgjegjësi për humbjen e fondeve të BE-së dhe uljen e grantit të performancës, Kompensimi i dëmeve nga vërshimet dhe fatkeqësitë natyrore që nga viti 2022, Krijimi i grantit të katërt për investime kapitale.