Ajo quhej Ninalee Craig (Allen), ishte vetëm 23 vjeçe kur u bë protagoniste e një prej fotografive më ikonike të shekullit XX. Fotografia u realizua në gusht të vitit 1951 në Firence nga fotografja profesioniste amerikane, Ruth Orkin, me të cilën Ninalee u miqësua gjatë udhëtimit të saj në Evropë.

Në foton e njohur të titulluar: "Një vajzë amerikane në Itali", është një grua e re me trup elegant dhe ecje të sigurt, shëtit përgjatë trotuarit të Firences. Përgjatë rrugës, dhjetëra burra e vështrojnë, e ngacmojnë dhe i vardisen me shpresën për të tërhequr vëmendjen e saj. Ajo shfaqet e papërshkueshme nga kjo "stuhi" sysh e ngacmimesh. Shamia e hedhur krahëve i shërben si një mburojë ndaj botës gumëzhitëse dhe realitetit mashkullor që kërkon ta përpijë. Megjithatë, ajo qëndron stoike dhe vazhdon rrugën e saj plot dinjitet e sfidë.

Fotografia është një fokusim i pastër i një momenti real, pa trukazhe, pa modele profesioniste dhe pa parapërgatitje. Është një sekuencë jetësore që kap frymën e Italisë së viteve '50.

Në shikim të parë, imazhi mund të krijojë irritim për mënyrën se si burrat e rrethojnë dhe e trajtojnë atë.

Sidoqoftë, vetë Ninalee Craig ka sqaruar në intervista të mëvonshme se imazhi nuk përfaqëson ngacmim apo kërcënim, por liri, siguri dhe pavarësi. Kur ishte 83 vjeçe (Në foton e poshtë, me të njëjtin shall 60 vite më vonë, krah fotos ikonë), Craig shpjegoi për Today Show: "Disa njerëz duan ta përdorin këtë foto si simbol të ngacmimit ndaj grave, por kjo nuk është e vërtetë. Nuk është simbol i ngacmimit, por simbol i një gruaje që po shijon momente absolutisht të mrekullueshme!"

Ajo që shpesh anashkalohet është historia më e thellë pas këtij imazhi. Në vitin 1951, Ninalee Craig ishte një aventuriere e guximshme. Në një kohë kur ishte e pazakontë që një grua të udhëtonte e vetme, ajo kishte lënë punën e saj në SHBA dhe po udhëtonte prej më shumë se gjashtë muajsh nëpër Francë, Spanjë dhe Itali me një buxhet prej vetëm 1 dollari në ditë.

Në Firence u takua me fotografen 29-vjeçare, Ruth Orkin. Të dyja vendosën të realizonin një projekt fotografik mbi përvojën dhe sfidat e një gruaje që udhëton e vetme në Evropë.

Sipas Craig, perceptimi i fotos ndryshon kryesisht nga gjinia e shikuesit:

Burrat që e shohin fotografinë e pyesin shpesh: "A u frikësove? A kishit nevojë për mbrojtje?"

Gratë, nga ana tjetër, e shohin me një buzëqeshje bashkëfajësie dhe thonë: "Sa e mrekullueshme! A nuk janë të admirueshëm italianët që të bëjnë të ndihesh kaq e vlerësuar?"

Ninalee këmbëngulte se asnjë nga burrat në rrugë nuk kishte qëllime të këqija apo agresive. Përveç gjestit të njohur të djalit mbi motor, i cili në fakt po shprehte admirim popullor italian, askush nuk e kaloi kufirin e sjelljes qytetare.

Pas aventurës evropiane, Ninalee u kthye në Nju Jork ku punoi si mësuese dhe më pas si shkrimtare tekstesh reklamuese.

Më vonë u shpërngul në Kanada, ku u bë nënë, gjyshe, stërgjyshe dhe një përkrahëse e zellshme e arteve në Toronto. Ninalee Craig ndërroi jetë në vitin 2018 në moshën 90-vjeçare, por ajo mbeti gjithmonë krenare që u bë pjesë e kësaj historie fotografike që vazhdon të frymëzojë breza të tërë.

Përgatiti: Albert Vataj