Legjenda e muzikës “country”, Dolly Parton, është ndarë nga jeta të martën në moshën 80-vjeçare, pas një beteje të shkurtër me kancerin.

Lajmi u konfirmua nga publicisti i saj, Marcel Pariseau, i cili bëri të ditur se Parton ndërroi jetë në Vanderbilt-Ingram Cancer Center në Nashville, e rrethuar nga familjarët dhe njerëzit e saj të dashur.

Pak orë më herët, vdekjen e këngëtares e kishte njoftuar edhe nipi i saj, Bryan Seaver, duke thënë se ajo u nda nga jeta paqësisht në Nashville.

Parton ishte një prej figurave më të njohura dhe më të dashura të muzikës amerikane. Karriera e saj, e shtrirë në rreth shtatë dekada, solli disa prej këngëve më ikonike të muzikës country dhe pop, mes tyre “Jolene”, “9 to 5” dhe “I Will Always Love You”.

Përfaqësuesi i saj e kujtoi Parton jo vetëm për muzikën, por edhe për humanizmin dhe bujarinë e saj.

Përmes Imagination Library, iniciativa e saj për promovimin e leximit, miliona fëmijë kanë përfituar libra falas. Parton ishte gjithashtu një mbështetëse e rëndësishme e kërkimit shkencor, përfshirë financimin e kërkimeve që ndihmuan në zhvillimin e vaksinës kundër COVID-19.

Vdekja e saj shënon fundin e një epoke për muzikën “country”. Dolly Parton la pas një trashëgimi të jashtëzakonshme si këngëtare, autore këngësh, aktore dhe filantrope, duke u shndërruar në një prej ikonave më të njohura të kulturës amerikane.