Në 24 orët e fundit në vend janë regjistruar gjithsej 33 zjarre në ambient të hapur në territorin e vendit tonë, nga të cilat 4 janë aktive, 4 janë nën kontroll, ndërsa 25 janë shuar, njoftoi sot në mëngjes Qendra për Menaxhim me Kriza, shkruan Portalb.mk.

Zjarre aktive ka në komunat Studeniçan dhe Zelenikovë – pranë fshatrave Moranë, Vërtekicë dhe Gaber me degëzim drejt fshatrave Paligrad dhe Vërazhallë në Komunën e Zelenikovës, në Komunën e Makedonski Brodit – pranë vendit Vidush dhe fshatrave Dragov Doll dhe Lokvicë, në Komunën e Kërçovës – pranë fshatrave Tajmishte dhe vendin Darda dhe në Komunën e Gostivarit – pranë fshatit “Gorna Gjonovica”.

Zjarret janë nën kontroll në fshatin Ilinden, pranë fshatit Bigla në Dellçevë, pranë fshatit Tudencë në Komunën e Jegunovcit dhe në Komunën e Vrapçishtit – pranë fshatrave Lomnicë dhe Gjergjevishtë.

Në ndërkohë, është shmangur një katastrofë në fshatin Bonçe të Prilepit, pasi atje shpërtheu një zjarr i cili, për shkak të erës, mëngjesin e sotëm rreth orës 4 iu afrua shtëpive të para. Për këtë informoi drejtori i Drejtorisë për Mbrojtje dhe Shpëtim, Stojançe Angellov, i cili tha se situata ishte jashtëzakonisht serioze.

Në shuarjen e zjarrit në këtë fshat, ku ka rreth 50 shtëpi, morën pjesë zjarrfikës nga Prilepi dhe Kavadari, si dhe vullnetarë nga Manastiri dhe Koçani.

“Nëse nuk do të ishin këtu, zjarri do të përfshinte fshatin dhe do të kishim një pamje të tmerrshme. Atje jeton edhe një nënë e re me foshnjë, të cilën e pashë ditët e fundit”, deklaroi Angellov.

Kujtojmë se Qeveria ka shpallur gjendje të krizës në të gjithë territorin e Republikës së Maqedonisë së Veriut deri në fund të gushtit për shkak të rritjes së rreziqeve dhe kërcënimeve nga zjarret në hapësira të hapura dhe zjarret pyjore. Ndërkohë Instituti i Shëndetit Publik (IShP) u ka bërë thirrje qytetarëve të marrin masa për mbrojtje nga vala e të nxehtit.

Ndryshe, Maqedonia e Veriut, viteve të kaluara është përballur me shumë zjarre. Gjatë muajit gusht dhe shtator të vitit të kaluar u raportuan një sërë zjarresh.