Deputetë të Partisë Demokratike të Kosovës (PDK) janë vendosur përpara goditës qeveritare të kryeministrit në detyrë Albin Kurti duke i bllokuar këtij të fundit hyrjen kryesore në institucion.
Deputetja Eliza Hoxha thotë se Kurti po ushtron funksionin e tij si kryeministër në kundërshtim me ligjin. Ajo i referohet ngërçit politik, me të cilin Kosova prej muajsh po përballet për shkak të moskonstituimit të Kuvendit.
“Që nga dita kur e kanë bërë betimin si deputetë, jo prej certifikimit të rezultateve, ata qëndrojnë ilegalisht në pozicionet që i ushtrojnë edhe sot. Për këtë jemi mbledhur këtu, për të mos e lejuar hyrjen e tij në zyrat e Kryeministrisë. Z. Kurti duhet ta kuptojë se, në vend që ta sabotojë Kuvendin, duhet të vijë aty dhe të krijojë mundësi për ta konstituuar Kuvendin. Ky është qëllimi parësor dhe puna e tij parësore që duhet ta bëjë si fitues i zgjedhjeve të fundit, ta propozojë emrin dhe të ecim përpara me themelimin e institucioneve të legjislaturës së 11-të”, tha mes tjerash Hoxha.
Kjo është dita e datë që deputetë të PDK “i zënë derën” Albin Kurtit. Afati i fundit për konstituimin e Kuvendit ishte 7 gushti. Kurti kërkoi më shumë kohë për të biseduar me partitë opozitare me qëllim arritjen e një marrëveshje për emrin e presidentit të ri, në mënyrë që të shmangeshin zgjedhjet e 4-ta që nga fillimi i vitit 2025.
Përveç Lëvizjes Demokratike të Kosovës (LDK) të drejtuar nga Lumir Abdixhiku, asnjë parti tjetër opozitare nuk e ka pranuar ftesën e Kurtit për bisedime. As me LDK nuk është arritur një marrëveshje.
Zgjedhjet e fundit në Kosovë u mbajtën me 7 qershor, rezultat që u dominua përsëri nga Lëvizja Vetëvendosje e Albin Kurtit, i cili mori 53 mandate. Rrjedhimisht ai ka nevojë për bashkim forcash me opozitën për t’i dhënë vendit presidentin e ti e për t’i dhënë fund krizës institucionale.
Duhen të paktën 61 për ta konstituuar Kuvendin dhe formuar Qeverinë e re. Për zgjedhjen e presidentit të Kosovës nevojitet prania e 80 deputetëve në sallën e Kuvendit me 120 vende që votimi të jetë i vlefshëm.
/tvklan.al
