Bashkimi Demokratik për Integrim (BDI) ka akuzuar Qeverinë se përmes ribalancit të buxhetit të Ministrisë së Shëndetësisë po paraqet investime kapitale pa mbulim financiar, ndërsa në të njëjtën kohë shkurton mjetet për programet preventive që lidhen drejtpërdrejt me mbrojtjen e shëndetit të qytetarëve.

Në një konferencë për shtyp, anëtari i Këshillit të Përgjithshëm të BDI-së, Imran Zhupani, tha se dokumentet e ribalancit zbulojnë një “skemë seriozisht shqetësuese”, ku parashihen 300 milionë denarë, rreth 4.9 milionë euro, për rikonstruksionin dhe zgjerimin e objekteve të institucioneve publike shëndetësore, të klasifikuara si “objekte të tjera ndërtimore”.

Sipas tij, këto mjete nuk janë të planifikuara në buxhetin bazë, por në kolonën e shpenzimeve nga aktivitetet vetëfinancuese, një burim që, sipas informacioneve nga brenda Ministrisë së Shëndetësisë, realizon vetëm 1 deri në 3 milionë denarë në vit.

“Si mund të planifikohen 300 milionë denarë nga një burim që siguron vetëm një pjesë minimale të kësaj shume? Nga do të vijnë realisht këto para? A ekzistojnë këto mjete apo janë vendosur vetëm në letër për nevoja propagandistike? Dhe a po krijohen detyrime ndaj kompanive pa mbulim financiar, duke rrezikuar padi ndaj shtetit?”, pyeti Zhupani.

Ai theksoi se, paralelisht me këtë investim që BDI e konsideron të dyshimtë, ribalanci parasheh ulje të fondeve për një sërë programesh preventive.

Sipas të dhënave të prezantuara, buxheti për mbrojtjen shëndetësore preventive ulet nga 677.2 milionë në 670 milionë denarë, ndërsa shkurtime pësojnë edhe programet për parandalimin e sëmundjeve kardiovaskulare, kontrollet sistematike të nxënësve dhe studentëve, kujdesin parësor shëndetësor, luftën kundër tuberkulozit, shëndetin e nënave dhe fëmijëve, zbulimin e hershëm të sëmundjeve malinje, programi “Shëndet për të gjithë”, mbrojtja shëndetësore e personave me çrregullime mendore dhe trajtimi i personave që përdorin drogë.

Zhupani vlerësoi se pasojat e këtyre shkurtimeve nuk mbeten vetëm në dokumentet buxhetore, por reflektohen drejtpërdrejt te qytetarët përmes mungesës së kontrolleve parandaluese, diagnostikimit dhe trajtimit në kohë.

BDI kërkoi nga Ministria e Shëndetësisë të publikojë realizimin e llogarisë së vetëfinancimit për tre vitet e fundit, burimin konkret të 300 milionë denarëve të planifikuar, listën e projekteve dhe kontratave që do të financohen, detyrimet e papaguara ndaj kompanive, arsyet për shkurtimin e secilit program preventiv, si dhe numrin e qytetarëve dhe shërbimeve që do të preken.

Sipas BDI-së, “shëndetësia nuk mund të drejtohet me shifra të sajuara, investime pa mbulim dhe shkurtime në programet që mbrojnë jetën e qytetarëve”, ndërsa Qeveria duhet të japë përgjigje konkrete dhe jo, siç u tha, “prezantime propagandistike”.