Këshilli i Komunës së Kërçovës, me shumicë votash, miratoi propozim-vendimin me të cilin Komuna merr përsipër shlyerjen e borxhit të Ndërmarrjes Publike Komunalec në vlerë prej 10 milionë denarësh.
Sekretari i Komunës së Kërçovës, Aleksandar Mickoski, sqaroi se kërkesa e NP Komunalec lidhet me mbulimin e shpenzimeve të krijuara nga transporti i mbeturinave nga Kërçova deri te deponia, çka ka sjellë krijimin e këtij borxhi.

Ndërkohë, këshilltari i Aleancës Kombëtare për Integrim (AKI), Ilir Rushani, propozoi që Komuna të marrë përsipër edhe shlyerjen e borxheve që shkollat e mesme kanë ndaj NP Komunalec, në vlerë të përgjithshme prej rreth 6 milionë denarësh.

Megjithatë, pas koordinimit mes grupeve të këshilltarëve, u arrit dakordim që kjo çështje të shtyhet për shqyrtim në seancën e radhës të Këshillit të Komunës së Kërçovës.