Respektimi i gjuhës shqipe dhe rregullores së Kuvendit shpiu në një përplasje argumentesh midis deputetëve dhe kryeparlamentarit Afrim Gashi. Opozita shqiptare tha se me propozim-ligjin për zbatimin e projektit  “Shkupi - Qendër Evropiane e Kulturës 2028”, nuk është respektuar gjuha shqipe dhe kërkuan tërheqjen nga rendi i ditës në seancë plenare, i cili, sipas tyre, është thirrur me urgjencë duke shkelur rregulloren.

“Nuk ua falim, Afrim Gashi, juve, që në këtë formë i nënshkruani ligjet, të arkivuara dhe nënshkrimi juaj qëndron vetëm në dokumentin në gjuhën maqedonase, ndërkaq në dokumentin në gjuhën shqipe nuk ka as numër arkivi dhe as nuk ka nënshkrimet e juaja.”, - deklaroi deputetja e Lidhjes Shqiptare, Ilire Dauti. 

“Ku është arsyetimi i urgjencës?! Po ju, doni t’i korruptoni disa gjëra në seancë! Njësoj ishte para dhjetë ditëve me ligjin për arsim sipëror.”, - theksoi deputeti i ASh-së, Halil Snopçe.

Seanca u ndërpre për një koordinim të jashtëzakonshëm dhe si pasojë e përplasjeve, propozim-ligji i propozuar nga grupi parlamentar i VMRO – DPMNE-së u tërhoq nga rendi i ditës.

“Proceduralet që u thanë aty u morëm vesh se nuk qëndrojnë. Prandaj, u morëm vesh me kompromis që atë pikë ta tërheqim nga rendi i ditës dhe unë pikërisht këtë e bëra. Nuk e thirra përfaqësuesin e deputetëve që të propozojë ligjin dhe nuk e propozova këtë pikë të rendit të ditës.”, - theksoi kryetari i Kuvendit, Afrim Gashi.

Edhe Platforma e organizatave të shoqërisë civile për luftën kundër korrupsionit ka kërkuar nga Kuvendi që menjëherë të ndalojë miratimin e Projektligjit për zbatimin e projektit, i cili, sipas tyre, përjashton  zbatimin e Ligjit për Prokurimet Publike. Ligji do të vendoset në një seancë të re pas pushimit veror.

MERAL ISMAILI