Lideri, i Bashkimit Demokratik për Integrim Ali Ahmeti i shoqëruar nga kryetari i Degës së BDI-së në Kërçovë, Arlind Sejdini, dhe bashkëpartiakë të tjerë, zhvilloi një takim me mërgatën kërçovare në Sheshin "Skënderbeu" në fshatin Garanë. Takimi u organizua me rastin e qëndrimit të mërgimtarëve në vendlindje për pushimet verore.
Në fjalën e tij, kryetari i Degës së BDI-së në Kërçovë, Arlind Sejdini, u uroi mirëseardhje mërgimtarëve, duke theksuar se roli dhe kontributi i tyre janë shumë të rëndësishëm në të gjitha zhvillimet e Kërçovës dhe më gjerë.

Takimi u zhvillua në formë interaktive, ku të pranishmit patën mundësi t'i drejtonin pyetje liderit të BDI-së. Mes temave të diskutimit ishte edhe humbja e Kërçovës në zgjedhjet lokale. Duke iu përgjigjur kësaj pyetjeje, Ali Ahmeti bëri një krahasim me të kaluarën kombëtare, duke theksuar se shqiptarët janë shumicë në Kërçovë, por sipas tij, në zgjedhjet lokale ka pasur rekrutime nga pala tjetër.
Ahmeti bëri thirrje për unitet dhe bashkim, duke theksuar se vetëm të bashkuar mund të arrihen fitore në zgjedhjet dhe sfidat e ardhshme.