Vizita zyrtare e Presidentes së Indisë, Droupadi Murmu, në vendin tonë u shoqërua me masa të rrepta sigurie edhe në Kërçovë.
Për disa minuta, komunikacioni në rrugën magjistrale që kalon nëpër Kërçovë u bllokua për shkak të kalimit të autokolonës së Presidentes Murmu, e cila po udhëtonte nga Shkupi drejt Ohrit, ku po zhvillon aktivitete në kuadër të vizitës së saj zyrtare.
Siguria ishte e shtuar si në tokë, ashtu edhe nga ajri. Përveç pranisë së numrit të madh të forcave policore përgjatë itinerarit, mbi zonë patrullonte edhe një helikopter, i cili monitoronte lëvizjen e autokolonës presidenciale.
Masat e sigurisë dhe prania e helikopterit tërhoqën vëmendjen e qytetarëve, të cilët ishin të bllokuar në rrugë.
Pas kalimit të saj, komunikacioni u normalizua dhe qarkullimi i automjeteve vazhdoi pa pengesa.