U mbajt takim i jashtëzakonshëm koordinues për situatën me ujin e pijshëm – situata po qetësohet, numri i pacientëve në rënie

Në Komunën e Gostivarit sot u mbajt një takim i jashtëzakonshëm koordinues me kryetarët e komunave të Rajonit të Pollogut dhe përfaqësues të institucioneve kompetente, ku u diskutua situata e furnizimit me ujë të pijshëm dhe masat që po ndërmerren për normalizimin e gjendjes.

Në takim u shqyrtua gjendja aktuale në terren, si dhe aktivitetet e përbashkëta institucionale që po realizohen për tejkalimin sa më të shpejtë të situatës.

Kryetari i Komunës së Gostivarit, Valbon Limani, theksoi se situata e krijuar gjatë javës së fundit kërkoi ndërmarrjen e masave urgjente, të cilat janë zbatuar në kohë dhe tashmë po japin rezultatet e para.

“Situata në Gostivar, e cila u krijua javën e fundit, kërkonte që të ndërmerreshin disa masa, të cilat u morën në kohë. Ngadalë situata po fillon të qetësohet, duke pasur parasysh se numri i pacientëve që kanë kërkuar ndihmë në Spitalin e Gostivarit është në rënie të ndjeshme. Më 20 korrik kishim rreth 50 për qind më pak pacientë krahasuar me 19 korrikun, ndërsa më 21 korrik numri është zvogëluar edhe më tej, gjë që tregon se situata epidemiologjike po qetësohet”, deklaroi Limani.

Ai theksoi se, krahas menaxhimit të situatës epidemiologjike, sfidë mbetet edhe furnizimi me ujë të pijshëm, ndërsa falë koordinimit institucional dhe bashkëpunimit ndërkomunal janë ndërmarrë masa konkrete për tejkalimin e krizës.

Limani bëri të ditur se fillimisht është formuar Shtabi Lokal për Menaxhimin e Krizës, ndërsa pas shpalljes së gjendjes së krizës në nivel qendror është aktivizuar edhe Shtabi Qendror për Menaxhimin e Situatës.

“Ditën e djeshme mbajtëm një mbledhje, ku u përcaktuan hapat që do t’i ndërmarrin institucionet në koordinim me njëra-tjetrën, me qëllim që kjo situatë të tejkalohet sa më shpejt dhe të rikthehet normaliteti për qytetarët”, u shpreh Limani.

Në përfundim të takimit, kryetari Limani shprehu mirënjohje për kryetarët e komunave të Rajonit të Pollogut, institucionet shtetërore dhe të gjithë mekanizmat e përfshirë për mbështetjen dhe bashkëpunimin e ofruar në menaxhimin e situatës, duke theksuar se vetëm përmes koordinimit të ngushtë institucional mund të tejkalohet sa më shpejt kjo sfidë.

Komuna e Gostivarit mbetet e angazhuar në monitorimin e vazhdueshëm të situatës dhe në koordinim të plotë me institucionet kompetente, me qëllim mbrojtjen e shëndetit publik dhe rikthimin sa më të shpejtë të normalitetit për të gjithë qytetarët.