Tre personat e dyshuar në hetimin për ndotjen e ujit të pijshëm në Gostivar sot janë paraqitur para gjyqtarit të procedurës paraprake në Gjykatën Themelore të Gostivarit, pasi Prokuroria Publike hapi hetim për veprën penale “vepra të rënda kundër mjedisit dhe natyrës, të shkaktuara me ndotje të ujit të pijshëm”.

Para gjyqtarit janë paraqitur ushtruesja e detyrës drejtoreshë e NP “Komunalec” – Gostivar, Artana Asani, udhëheqësi teknik Leon Mezini dhe përgjegjësi i Departamentit për ujësjellës, kanalizim dhe punë ndërtimore, Vadedin Dauti.

Sipas Prokurorisë, të dyshuarit më 25 qershor, si bashkëkryerës, dyshohet se kanë urdhëruar vendosjen e tre pompave në një kanal me ujë sipërfaqësor që përmbante materie të dëmshme, pranë dhomës së mbushjes së sistemit të furnizimit me ujë, me qëllim testimin e presionit të ujit.

Gjatë kontrollit të kryer më 16 korrik është konstatuar se dy nga pompat ende ishin në funksion dhe përmes tyre uji me materie të dëmshme po transferohej në sistemin e ujit të pijshëm.

Analizat e Institutit të Shëndetit Publik kanë treguar se uji nga kanali sipërfaqësor ishte shumë i ndotur dhe i papërdorshëm për çdo qëllim, ndërsa ndotje është konstatuar edhe në mostrat nga burimi i kapur dhe rrjeti i ujësjellësit.

Për masat ndaj të dyshuarve do të vendosë gjyqtari i procedurës paraprake. Prokuroria Publike në Gostivar njoftoi se hetimi vazhdon me ndërmarrjen e veprimeve të tjera hetimore.