Komuna e Kërçovës organizoi sot Sesionin e Parë të Forumit në kuadër të projektit "Fuqizimi i Këshillave Komunalë – Faza 2", me pjesëmarrjen e qytetarëve, përfaqësuesve të shoqatave, institucioneve ,dhe qytetarë të tjerë.
Qëllimi i forumit ishte përfshirja aktive e komunitetit në identifikimin e nevojave lokale, propozimin e zgjidhjeve dhe përzgjedhjen e fushave prioritare për përgatitjen e projekteve që do të financohen në kuadër të programit.
Në hapjen e forumit mori pjesë edhe kryetari i Komunës së Kërçovës, Aleksandar Jovanovski, i cili theksoi se ky forum paraqet një mundësi të mirë për të dëgjuar propozimet dhe idetë e qytetarëve për zhvillimin e komunës dhe përmirësimin e kushteve të jetesës.

Pas prezantimit të bërë nga Liljana Jonoski, qytetarët paraqitën idetë dhe propozimet e tyre për projektet që mund të përfshihen në program. Vlera e përgjithshme e projektit është 18 mijë dollarë.

Megjithatë, gjatë forumit pati edhe qytetarë të pakënaqur me mënyrën e zhvillimit të diskutimeve, të cilët, në shenjë pakënaqësie, e braktisën takimin në mënyrë demonstrative.