Kryetari i Rahovecit, Smajl Latifi, ka marrë pjesë në zbulimin e pllakës përkujtimore kushtuar dëshmorëve të atdheut: Mustafë Durguti, Halim Durguti dhe Nuredin Durguti, të cilët u pushkatuan nga forcat e regjimit të ri pushtues serbo-jugosllav, në Bubavec, më 13 dhjetor 1945.

“Mustafë Durguti ishte personalitet i veçantë atdhetar që veproi pareshtur për lirinë dhe bashkimin e trojeve shqiptare deri në frymën e fundit. Sakrifica e tyre është gurthemeli mbi të cilin u ndërtua rruga jonë drejt lirisë. Emrat dhe vepra e tyre do të mbeten përherë të gdhendur në kujtesën tonë kolektive, si frymëzim për brezat që vijnë. Është detyrë e secilit prej nesh ta ruajmë dhe ta nderojmë këtë trashëgimi, duke kujtuar me mirënjohje ata që dhanë gjithçka për atdheun dhe lirinë e tij. Lavdi e përjetshme Mustafë Durgutit, Halim Durgutit dhe Nuredin Durgutit! Qoftë i paharruar kujtimi dhe sakrifica e tyre!”, ka shkruar Latifi në “Facebook”.