Zëvendëskryeministri dhe ministri i Transportit, Aleksandar Nikoloski, deklaroi se pas vizitës së Misionit të UNESCO-s është dukshëm më optimist lidhur me realizimin e segmentit autostrador Trebenishtë – Strugë – Qafëthanë. Sipas tij, më nuk shtrohet pyetja nëse autostrada do të ndërtohet, por vetëm se nëpër cilën trasë do të kalojë.

“Para vizitës së Misionit kishte mendime që projekti të ndalej plotësisht. Sot tashmë flasim vetëm për zgjedhjen e trasës. Pavarësisht nëse do të jetë një kilometër majtas apo djathtas, më e rëndësishme është që autostrada do të realizohet. Pas përfundimit të Misionit jam shumë më optimist”, deklaroi Nikoloski gjatë vizitës në Tetovë.

Ai theksoi se pret që Rajoni i Ohrit ta ruajë statusin e trashëgimisë natyrore dhe kulturore botërore, pa u futur në Listën e zonave të rrezikuara të UNESCO-s. Vendimi përfundimtar, siç tha, pritet pas Asamblesë së Përgjithshme të UNESCO-s, e cila javën e ardhshme do të mbahet në Korenë e Jugut.

“Po zhvillojmë një aktivitet serioz diplomatik dhe arritëm të sjellim në Maqedoni më shumë se dhjetë ambasadorë të vendeve anëtare të UNESCO-s. Nuk dua të parashikoj paraprakisht, por besoj se do të arrijmë ta shmangim skenarin që Rajoni i Ohrit të shpallet zonë e rrezikuar”, tha Nikoloski.

Ai kujtoi se më 26 qershor në Qeveri është mbajtur takim me ambasadorët e vendeve anëtare të UNESCO-s, ku është diskutuar për mbrojtjen dhe zhvillimin e qëndrueshëm të Rajonit të Ohrit.

Sipas Nikoloskit, të gjithë pjesëmarrësit janë pajtuar se Rajoni i Ohrit paraqet një pasuri të jashtëzakonshme natyrore dhe kulturore botërore, për çka është e domosdoshme një bashkëpunim edhe më i fuqishëm ndërkufitar mes Maqedonisë dhe Shqipërisë në mbrojtjen e Liqenit të Ohrit.

Ai theksoi se zhvillimi i rajonit duhet të ecë paralelisht me ruajtjen e vlerave të tij natyrore dhe kulturore, në interes të qytetarëve dhe gjeneratave të ardhshme. përcjell  Zhurnal.mk .