Kryeministri Rama përcolli sot në rrjetet sociale pamje nga stadiumi që po ngrihet në Kashar, enkas për koncertin e reperit dhe kantautorit Kanye West i njohur së fundmi si Ye.

Rama shkroi se, stadiumi është ngritur enkas për koncertin më të madh që ky vend ka parë ndonjëherë, për të cilin janë blerë nga të huajt më shumë bileta sesa për finalen e Conference League në Tiranë, e i cili do ta kthejë Tiranën të shtunën, më 11 korrik, në kryeqytetin botëror të spektaklit muzikor.

“Me stadiumin e ngritur enkas për koncertin më të madh që ky vend ka parë ndonjëherë, për të cilin janë blerë nga të huajt më shumë bileta sesa për finalen e Conference League në Tiranë, e i cili do ta kthejë Tiranën të shtunën, më 11 korrik, në kryeqytetin botëror të spektaklit muzikor, uroj ditë të mbarë”- shkruan kryeministri Rama.

Koncerti është pjesë eYe Live Tour 2026, çmimi i biletave për të cilin nis prej 120 euro. Organizatorët kanë njoftuar për një produksion me skenografi mbresëlënëse, efekte vizuale dhe teknologji moderne.

Ye (Kanye West) mbetet një figurë e njohur ndërkombëtarisht, gjithnjë i pranishëm në showbiz botëror.

Pritet që koncerti i YE ta kthejë Tiranën në epiqendrën evropiane të muzikës, showbiz-it dhe kulturës me një superproduksion monumental, skenë gjigande, teknologji immersive dhe një eksperiencë që shkon përtej çdo koncerti të parë më parë në Shqipëri.

Ndërkohë vijon puna për ndërtimin e “Eagle Stadium”, stadiumi i cili do të mirëpresë rreth 60.000 spektatorë nga Shqipëria, rajoni e bota.