Qendra gjigante e të dhënave për Inteligjencën Artificiale, me vlerë 7.3 miliardë dollarë, që Microsoft po ndërton në Mount Pleasant të shtetit të Wisconsin, është vënë në qendër të një padie kolektive nga banorët e zonës, të cilët pretendojnë se zhurma e vazhdueshme e krijuar nga objekti po u dëmton jetën e përditshme dhe pronat.

Në fillim të këtij viti, drejtori ekzekutiv i Microsoft, Satya Nadella, e cilësoi kompleksin Fairwater si “qendrën më të fuqishme të të dhënave për Inteligjencën Artificiale në botë”, duke theksuar se ajo do të lidhë në një infrastrukturë të vetme qindra mijëra çipa të avancuar për përpunimin e AI.

Megjithatë, entuziazmi i kompanisë nuk ndahet nga banorët që jetojnë pranë objektit. Tre banorë të fshatit Sturtevant, i cili ndodhet ngjitur me Mount Pleasant, kanë ngritur një padi kolektive, duke akuzuar Microsoft se po gjeneron zhurmë të vazhdueshme dhe të tepërt, e cila sipas tyre përbën shqetësim serioz dhe ka shkaktuar dëme në pronat e tyre.

Sipas padisë, burimi kryesor i zhurmës janë gjeneratorët me naftë, si edhe sistemet e ngrohjes, ventilimit dhe kondicionimit (HVAC), përfshirë ftohësit industrialë, kullat e ftohjes, njësitë e trajtimit të ajrit dhe ventilatorët e kondensimit. Banorët pretendojnë se Microsoft nuk ka marrë masat e nevojshme për izolimin akustik të këtyre pajisjeve, si ndërtimi i barrierave apo mureve mbrojtëse që do të reduktonin ndjeshëm nivelin e zhurmës.

Ky rast është një tjetër shembull i tensioneve në rritje mes kompanive të mëdha të teknologjisë dhe komuniteteve lokale, ndërsa ndërtimi i qendrave të mëdha të të dhënave po zgjerohet me ritme të shpejta. Përveç konsumit të lartë të energjisë dhe ujit, këto objekte po përballen gjithnjë e më shpesh me kritika për ndikimin e tyre në mjedis dhe cilësinë e jetës së banorëve përreth.

Vetëm javën e kaluar, një banor në jugperëndim të shtetit të Michigan raportoi se niveli i zhurmës nga një qendër e ngjashme të dhënash arrinte në rreth 60 decibel në verandën e shtëpisë së tij, një nivel që konsiderohet shqetësues kur është i pandërprerë.

Një nga paditëset, Amy Cimbalnik, deklaroi për mediat amerikane se zhurma që vjen nga kompleksi i Microsoft ngjan me tingullin e një lokomotive mallrash që qëndron e ndezur pranë shtëpisë gjatë gjithë ditës. “E dëgjonim 24 orë në ditë dhe më pas kuptuam se vinte nga kampusi i Microsoft,” u shpreh ajo.

Nga ana e saj, Microsoft ka konfirmuar se është në dijeni të padisë dhe deklaron se mbetet e përkushtuar për të qenë “një fqinj i mirë” në komunitetet ku ndërton dhe operon qendrat e saj të të dhënave.

Kompania kishte deklaruar muajin e kaluar se problemi ishte zgjidhur. Në një përditësim të publikuar më 18 qershor në blogun zyrtar, Microsoft bëri të ditur se kishte identifikuar burimin e zhurmës, kishte kryer testime dhe kishte vendosur masa për reduktimin e saj. Sipas kompanisë, tingulli karakteristik i vazhdueshëm shkaktohej nga ventilatorët e sistemit të ftohjes, të cilët funksiononin me shpejtësi të lartë.

Microsoft pretendon se monitorimet e pavarura dhe reagimet e disa banorëve konfirmuan se masat e marra e kishin eliminuar problemin. Megjithatë, fakti që padia kolektive u depozitua më 1 korrik tregon se jo të gjithë banorët ndajnë të njëjtin vlerësim.

Edhe autoritetet lokale kanë deklaruar se, pas ndërhyrjeve të Microsoft në muajin prill, nuk kanë marrë ankesa të reja për zhurmën. Drejtori i komunikimit i Bashkisë së Mount Pleasant, Sean Ryan, tha se institucionet do të vazhdojnë të monitorojnë situatën dhe do të reagojnë nëse qytetarët paraqesin shqetësime të reja.

Ndërkohë, sfida për Microsoft mund të bëhet edhe më e madhe. Kompania planifikon të ndërtojë deri në 15 qendra të dhënash vetëm në zonën e Mount Pleasant, çka do ta vendosë nën një vëmendje edhe më të madhe nga komuniteti lokal dhe mund të sjellë përballje të tjera ligjore nëse shqetësimet e banorëve nuk adresohen në mënyrë efektive.