Gazetaria shqiptare në Maqedoninë e Veriut ka humbur një nga emrat e saj të respektuar. Pas mesnatës ka ndërruar jetë gazetari, publicisti dhe intelektuali Nijazi Muhamedi, duke lënë pas një trashëgimi të rëndësishme në fushën e medias, publicistikës dhe kulturës shqiptare.

Nijazi Muhamedi lindi në vitin 1947 në fshatin Xhepçisht të Tetovës. Shkollën e mesme e kreu në Tetovë, ndërsa Fakultetin Juridik në Universitetin e Beogradit. Me gazetarinë nisi të merrej që në bankat e shkollës së mesme, duke bashkëpunuar me gazetat “Flaka e Vëllazërimit”, “Zëri i Rinisë”, “Rilindja” dhe media të tjera shqiptare.

Gjatë karrierës së tij, Muhamedi ishte lektor në “Flakën e Vëllazërimit”, profesor i gjuhës shqipe në Gjimnazin e Tetovës, ndërsa më pas iu bashkua Radiotelevizionit të Maqedonisë. Në RTVM ai ushtroi detyrat e lektorit, redaktorit dhe gazetarit në programin në gjuhën shqipe, duke dhënë kontribut të rëndësishëm në zhvillimin e medias shqipe në vend.

Në periudhën 1996–1998, Nijazi Muhamedi u bë zëvendësdrejtori i parë shqiptar i përgjithshëm i RTVM-së, ndërsa deri në pension shërbeu si këshilltar i drejtorit të përgjithshëm.

Përveç gazetarisë, Muhamedi la gjurmë edhe në publicistikë. Ai ishte autor i disa veprave me tema politike, historike, shoqërore dhe kulturore, ndër të cilat “Fjala në shteg”, “Punët e këtushme”, “Vështrime në anën përballë” dhe “Maqedonia shqiptare”.

Ndarja e tij nga jeta ka pikëlluar familjen, kolegët, miqtë dhe komunitetin e gazetarëve shqiptarë. Nijazi Muhamedi do të kujtohet si një nga figurat e rëndësishme të gazetarisë dhe publicistikës shqiptare në Maqedoninë e Veriut, me një kontribut shumëvjeçar në informimin, kulturën dhe mendimin publik shqiptar./VOXAL/