Zëvendëskryeministri i parë dhe përfaqësuesi i VLEN-it, Bekim Sali në emisionin “Analizë” në TV 24 ka thënë se për dy vjet si qeveri një pjesë të madhe të premtimeve kanë përmbushur dhe punën e saj ai e vlerëson me notën 9. Buxheti është i qëndrueshëm dhe nuk do të falimentojmë dhe se ka para në FSPIM.

Sali ka thënë se është simptomatike se sa herë që VLEN-it i ecin punët mbarë, Gjykata Kushtetuese sjell vendime për çështje etnike në favor të BDI-së.

“Ligji për përfaqësim të drejtë dhe adekuat është harmonizuar nga Komisioni i Venecias dhe ka udhëzime të qarta për të siguruar që të mos ketë abuzime. Unë pretendoj se ka mjaft profesionistë për të mos pasur nevojë për kuota etnike, ndërsa dokumentet personale do të jenë mbrojtje ndaj abuzimeve”, ka thënë Sali.
Duke folur për Raportin e KE-së për vendin ai tha se nuk është edhe aq negativ, siç pretendohet.

“Ka progres, intensivisht punohet në përmbushjen e të gjitha detyrave që kërkohen nga ana e KE-së. Jemi front lider në rajon dhe do jemi përsëri. Të premten do të votojmë gjithçka që është gati nga ligjet që lidhen me BE-në, nëse ka nevojë qeveria do të mblidhet edhe onlajn deri më 30 qershor”, ka thënë ai.

Më 7 korrik, Sali madje paralajmëroi ardhjen në vend të komisares për zgjerim të Bashkimit Evropian, Marta Kos.