Një grup turistësh përjetoi momente paniku në Guatemalë, pasi u gjend në afërsi të shpërthimit të vullkanit Volcán de Fuego, një nga më aktivët në botë, duke u përballur me një “shi” shkëmbinjsh të nxehtë që binin nga krateri.
Pamjet e regjistruara nga vetë vizitorët tregojnë çastin kur vullkani nis të shpërthejë, ndërsa anëtarët e grupit detyrohen të largohen me vrap për t’i shpëtuar gurëve të zjarrtë. Një prej turisteve, Anna Garcia, rrëfeu se copat e shkëmbinjve të nxehtë i dogjën xhaketën dhe se një prej tyre kaloi shumë pranë kokës së saj.
“Vullkani shpërtheu dhe arrita të filmoja vetëm një pjesë të vogël. Kur ngrita kokën, pashë shkëmbinj që po binin dhe u tmerrova. Më pas fillova të vrapoja”, tha ajo, duke e përshkruar ngjarjen si një përvojë të paharrueshme, por njëkohësisht jashtëzakonisht të frikshme.
Sipas studiuesve, Volcán de Fuego është pothuajse vazhdimisht aktiv, duke prodhuar shpërthime të vogla gazi dhe hiri çdo 15 deri në 20 minuta. Historikisht, vullkani ka shpërthyer më shumë se 60 herë që nga viti 1524. Një nga ngjarjet më tragjike ndodhi më 3 qershor 2018, kur rrjedhat e lavës varrosën vendbanime të tëra, duke shkaktuar mbi 100 viktima. Gjatë atij shpërthimi, kolona e hirit u ngrit deri në rreth 33 mijë metra lartësi dhe ishte e dukshme edhe nga hapësira.
