Portieri 40-vjeçar i Kepit të Gjelbër, Vozinha, vazhdon që të shkruajë historinë në Kupën e Botës. Pas paraqitjes së jashtëzakonshme ndaj Spanjës, ai ishte sërish protagonist në barazimin spektakolar 2-2 ndaj Uruguait. Ai udhëhoqi skuadrën e tij drejt një rezultati tjetër historik.

Momenti më dramatik i ndeshjes erdhi në minutën e 68-të, kur Maxi Araujo mendoi se kishte shënuar golin e tretë për Uruguain. Megjithatë, arbitri norvegjez Espen Eskas anuloi golin për pozicion jashtë loje, ndërsa tifozët e Kepi i Gjelbër shpërthyen në brohoritje për Vozinhën, i cili edhe një herë ishte simboli i rezistencës së ekipit të tij.

Ndërkohë në tribunat e stadiumit në Miami ndodhej një person shumë i veçantë: nëna e portierit, Ana Candida Evora, e cila për herë të parë në jetën e saj kishte lënë Kepi i Gjelbër për të ndjekur nga afër djalin në Kupën e Botës.

“Zemra më doli vendit gjatë ndeshjes, por sot fati ishte me ne. Jam jashtëzakonisht krenare për Cabo Verden dhe për djalin tim”, tha ajo për FIFA.

Evora mbërriti në Shtetet e Bashkuara të Amerikës vetëm dy ditë para ndeshjes, pasi më parë nuk kishte mundur të siguronte vizën për sfidën me Spanjën. Udhëtimi i saj u bë i mundur falë bashkëpunimit mes FIFA-s, Departamentit Amerikan të Shtetit, Federatës së Futbollit të Kepi i Gjelbër dhe autoriteteve të tjera.

Për portierin, mbështetja e nënës në stadium ishte një ëndërr e realizuar:

“Është një ëndërr për ne dhe për të gjithë caboverdianët. Të jemi këtu dhe të përfaqësojmë vendin tonë është një krenari e madhe. Kjo skuadër ka treguar karakter dhe një shpirt të jashtëzakonshëm”.

Edhe pse ndaj Uruguait nuk regjistroi asnjë pritje zyrtare, pozicionimi i tij në momentet vendimtare detyroi sulmuesit uruguaianë të gabonin, duke ndihmuar ekipin të ruante barazimin.

Historia e Vozinhës ka pushtuar rrjetet sociale. Pas ndeshjes me Spanjën, numri i ndjekësve të tij në Instagram u rrit nga rreth 50 mijë në mbi 15 milionë, duke e kthyer portierin veteran në një nga figurat më të dashura të këtij Botërori.

Në stadiumin me 64.003 spektatorë, emri i tij u brohorit vazhdimisht, madje duke marrë ovacione më të mëdha se disa prej yjeve të Uruguait. Mbrojtësi Pico Lopes e cilësoi mbështetjen e tifozëve si “lojtarin e 12-të” të kombëtares.

Me dy barazime në dy ndeshje, Kepi i Gjelbër mbetet një nga surprizat më të bukura të Kupës së Botës dhe do të kërkojë kualifikimin historik në fazën me eliminim direkt në ndeshjen e fundit të grupit ndaj Arabisë Saudite.