Lidhja Shqiptare, përmes Departamentit për Shëndetësi, ka reaguar ndaj njoftimit të Qeverisë për formimin e një Qendre për Ndihmën e Shpejtë në Shkup, duke vlerësuar se sektori i shëndetësisë ka nevojë për rezultate konkrete dhe jo vetëm për nisma të reja të prezantuara përmes konferencave për shtyp. Duke iu referuar raportit “Kompasi i Premtimeve”,LSH thekson se realizimi i premtimeve në shëndetësi mbetet në nivel të ulët dhe kërkon fokus më të madh në reformat që prekin drejtpërdrejt qytetarët dhe cilësinë e shërbimeve shëndetësore.
Në reagimin e plotë të LSH thuhet:
Shëndetësia nuk ka nevojë për më shumë konferenca për shtyp, por për rezultate
Nga njëra anë, Qeveria njofton formimin e një Qendre për Ndihmën e Shpejtë në Shkup. Çdo
iniciativë që synon shpëtimin e jetëve është e mirëseardhur. Por, nga ana tjetër, raporti "Kompasi i Premtimeve", i hartuar nga Finance Think në bashkëpunim me Shoqatën
e Mjekëve të Maqedonisë dhe Forumin Arsimor Rinor, flet qartë: vetëm 13% e premtimeve në shëndetësi janë realizuar, ndërsa 71% ende nuk kanë filluar të zbatohen.
Këto nuk janë vlerësime të opozitës, por të dhëna të një raporti të pavarur. Ato tregojnë se
mungon përparimi në reformat më të rëndësishme të sistemit shëndetësor, si:
• digjitalizimi i shërbimeve shëndetësore;
• ulja e listave të pritjes;
• përmirësimi i qasjes te specialistët;
• integrimi i niveleve të kujdesit shëndetësor;
• dhe reformat në shëndetësinë primare.
Qytetarët nuk kanë nevojë për institucione të reja vetëm në letër. Ata kanë nevojë për mjekë dhe infermierë të mjaftueshëm, ambulanca të pajisura, barna të disponueshme, diagnostikë në kohë dhe trajtim dinjitoz.
Reformat nuk maten me vendime qeveritare apo me konferenca për shtyp. Ato maten me jetët që shpëtohen, me pacientët që nuk presin me muaj për një kontroll, me shërbime që funksionojnë
dhe me profesionistët shëndetësorë që zgjedhin të qëndrojnë e të punojnë në vendin e tyre.
Shëndetësia meriton më shumë se premtime. Meriton rezultate konkrete.
Lidhja Shqiptare
Departamenti për Shëndetësi
