Në ambientet e bibliotekës “Skënder Luarasi” në Ersekë u shfaq monodrama “Andrra e Nan’ Terezës, Njerëzorja Hyjnore”, një produksion artistik kushtuar jetës dhe veprës së shenjtores shqiptare Nënë Tereza.

E interpretuar nga Justina Aliaj dhe me regji të Gëzim Kame, monodrama solli për publikun kolonjar dimensionin njerëzor dhe shpirtëror të figurës së Nënë Terezës, përmes një interpretimi emocional dhe të ndjerë.

“Frymëzimi ka qenë i madh për mua, ka qenë një ëndërr kjo figurë, një privilegj është roli më i rëndësishëm, më i vështiri që unë e var në gjerdanin e karrierës time”, tha aktorja e madhe, Justina Aliaj.

Shfaqja u mirëprit nga publiku i pranishëm, i cili e vlerësoi interpretimin me duartrokitje. Përmes këtij rrëfimi skenik, organizatorët synojnë të përcjellin tek brezat e rinj frymën e humanizmit, dashurisë dhe përkushtimit ndaj njeriut, vlera që identifikojnë figurën e Nënë Terezës. A.K./TemA