Posta e Maqedonisë së Veriut ka dhuruar tre automjete të reja për njësinë rajonale të postës në Kërçovë, me qëllim të përmirësimit të shërbimeve postare dhe rritjes së efikasitetit në punë.
Gjatë dorëzimit të automjeteve, drejtori i Postës së Maqedonisë së Veriut, Orhan Kurtishi, theksoi se ky investim do të kontribuojë në përmirësimin e cilësisë së shërbimeve për qytetarët e Kërçovës.

Ai bëri të ditur se në nivel shtetëror janë siguruar gjithsej 100 automjete të reja, prej të cilave 90 vetura dhe 10 furgonë, ndërsa shpërndarja e tyre nëpër njësitë rajonale është bërë në përputhje me nevojat dhe kërkesat e secilës njësi.

Nga ana tjetër, drejtoresha e Postës në Kërçovë, Gjylasfije Murati-Bekteshi, u shpreh se automjetet e reja kanë qenë një nevojë e domosdoshme për njësinë rajonale, pasi deri më tani janë përballur me vështirësi në këtë aspekt.
Ajo falënderoi drejtorin e përgjithshëm për angazhimin e tij në përmirësimin e kushteve të punës dhe të shërbimeve postare, duke theksuar se investime të tilla do të ndikojnë drejtpërdrejt në ofrimin e një shërbimi më cilësor dhe më të shpejtë për qytetarët e Kërçovës.