OpenAI, kompania pas ChatGPT, ka vendosur të çelë një zyrë në Madrid, në kuadër të planit të saj për zgjerim në tregun evropian dhe për të forcuar lidhjet me bizneset, zhvilluesit dhe institucionet në Spanjë.

Sipas kompanisë, Spanja është shndërruar në një nga mjediset më të gjalla të teknologjisë dhe inteligjencës artificiale në Evropë, ndërsa gjithnjë e më shumë kompani po integrojnë mjete të AI në operacionet dhe shërbimet e tyre.

Me këtë qendër të re, OpenAI synon të bashkëpunojë më afër me kompanitë spanjolle, administratat publike, qendrat kërkimore dhe zhvilluesit që përdorin modelet e saj të inteligjencës artificiale. E njëjta qasje është ndjekur edhe në shtete të tjera evropiane, ku kompania ka hapur zyra për të nxitur përdorimin e teknologjive të saj dhe për të rritur praninë në rajon.

E themeluar në vitin 2015 dhe e bërë e njohur globalisht nga lançimi i ChatGPT, OpenAI ka shtuar ritmin e zgjerimit ndërkombëtar në vitet e fundit. Aktualisht, ajo është e pranishme edhe në qytete si Londra, Parisi, Brukseli dhe Mynihu, në funksion të strategjisë së saj për të konsoliduar shtrirjen në Evropë.