Në ambientet e Fakultetit Teknik në Manastir, sot Safet Rika nga Kërçova mbrojti me sukses disertacionin e doktoratës me temë: “Analiza dhe modelimi i besueshmërisë së sistemit transportues të qymyrit në minierat sipërfaqësore”.

Me këtë mbrojtje, Rika fitoi gradën shkencore Doktor i Shkencave në programin e Inxhinierisë Industriale dhe Menaxhmentit. Punimi u realizua nën mentorimin e profesoreshës Elizabeta Hristovska, ndërsa komisioni vlerësues përbëhej nga profesorët Silvana Angelevska, Sonja Çalamani, Ivo Kuzmanov dhe Sevde Stavreva.

Safet Rika ka përfunduar studimet universitare në Inxhinieri Elektrike dhe Kompjuterike në Universitetin e Prishtinës, studimet e magjistraturës në Inxhinieri Grafike në Universitetin “Shën Kliment Ohridski” në Manastir, si dhe studimet e doktoratës në të njëjtin institucion.

Aktualisht, ai punon si mësimdhënës në SHMK “Drita” në Kërçovë, ndërsa ka qenë i angazhuar edhe në procesin mësimor në Universitetin e Tetovës. Krahas veprimtarisë në arsim, Rika është aktiv edhe në sektorin industrial, në fushën e instalimit dhe mirëmbajtjes së sistemeve industriale, si dhe është autor i disa punimeve shkencore të prezantuara në konferenca vendore dhe ndërkombëtare.

Doktori i ri i shkencave e cilësoi këtë sukses si rezultat të punës dhe përkushtimit shumëvjeçar, duke ia dedikuar këtë arritje familjes së tij për mbështetjen e vazhdueshme gjatë rrugëtimit akademik dhe profesional.