Këngëtari, kantautori dhe producenti amerikan Oliver Tree ka ndërruar jetë në moshën 32-vjeçare, pas një aksidenti tragjik ajror në Rio de Janeiro të Brazilit. Sipas raportimeve të mediave ndërkombëtare, dy helikopterë u përplasën në ajër të dielën në zonën Recreio dos Bandeirantes, në jugperëndim të qytetit bregdetar. Autoritetet braziliane konfirmuan se gjashtë persona humbën jetën si pasojë e aksidentit, ndërsa Oliver Tree ishte mes viktimave.

Policia Civile e Rio de Janeiros deklaroi se pesë persona ndodheshin në njërin helikopter, ndërsa në tjetrin ishte vetëm piloti. Pas përplasjes në ajër, të dy mjetet ajrore ranë mbi një autosallon automjetesh elektrike, duke shkaktuar zjarr dhe dëmtime në rreth 20 automjete. Oliver Tree ndodhej në Brazil në kuadër të turneut të tij “The World’s First World Tour”. Ai kishte performuar më 6 qershor në São Paulo dhe ishte planifikuar të vazhdonte turneun në Evropë me koncertin e parë në Lisbonë më 1 korrik.

Artisti u bë i njohur ndërkombëtarisht pas suksesit viral të këngës “When I’m Down” në bashkëpunim me Whethan. Në vitin 2017 ai firmosi me Atlantic Records dhe publikoi albumin e tij debutues “Ugly Is Beautiful” në vitin 2020. Oliver Tree fitoi popullaritet global me hitet “Life Goes On” dhe “Miss You”, ndërsa albumi i tij i fundit “Love You Madly Hate You Badly” u publikua më 24 prill përmes labelit të tij të pavarur Alien Boy Records. Autoritetet braziliane kanë nisur hetimet për zbardhjen e plotë të shkaqeve të aksidentit, ndërsa një ekspertizë mjeko-ligjore në vendin e ngjarjes është në proces.