Kanadaja nuk ka arritur të marrë më shumë se një pikë në ndeshjen hapëse të Kupës së Botës 2026, duke barazuar 1-1 ndaj Bosnjës në sfidën e Grupit B, të zhvilluar në Toronto. Vendasit u ndëshkuan në pjesën e parë nga Jovo Lukic, ndërsa Cyle Larin riktheu ekuilibrat në fundin e takimit.

Ndeshja nisi me ritëm të lartë dhe Kanadaja pati mundësinë e parë të artë në minutën e 15-të, por sulmuesi i Juventusit, Jonathan David nuk arriti ta shfrytëzonte rastin për të kaluar ekipin e tij në avantazh. Vetëm gjashtë minuta më vonë, erdhi ndëshkimi nga Bosnja pas një goditjeje nga këndi.

Pas devijimit të Kolasinac, Jovo Lukic u gjend në vendin e duhur dhe me një goditje të saktë me kokë dërgoi topin në rrjetë për avantazhin 1-0 të ballkanasve. Në pjesën e dytë, Kanadaja mori kontrollin e lojës dhe ushtroi presion të vazhdueshëm në kërkim të barazimit, por ishte Bosnja që rrezikoi të dyfishonte shifrat me një goditje me kokë të Muharemovic.

Trajneri Jesse Marsch ndryshoi lojën me zëvendësimet, ndërsa hyrja në fushë e Promise David rezultoi vendimtare. Në minutën e 78-të, ai shërbeu një asist të saktë për Cyle Larin, i cili ishte aktivizuar prej pak sekondash në fushë dhe në prekjen e parë të topit mposhti portierin Vasilj, me një goditje të bukur nga jashtë zonës. Ai episod vulosi rezultatin përfundimtar 1-1.

Pas këtij barazimi, Kanadaja dhe Bosnja ndajnë nga një pikë në Grupin B. Në këtë grup bëjnë pjesë edhe Katari e Zvicra, me këta të fundit që vlerësohen si favoritë për tu renditur në krye.