Kryeministri Edi Rama ka deklaruar se projekti i planifikuar në Zvërnec do të vijojë, duke e cilësuar atë si një mundësi të rëndësishme zhvillimi ekonomik për vendin.

Në një intervistë për Al Jazeera, Rama e përshkroi investimin si një “bekim për vendin”, duke theksuar se bëhet fjalë për një projekt me vlerë rreth 4 miliardë euro në një ekonomi me prodhim të brendshëm bruto rreth 27 miliardë euro.

Ai hodhi poshtë pretendimet se qeveria po shet apo po jep toka publike, duke theksuar se projekti bazohet në një marrëveshje mes palëve private.

“Ekziston pyetja nëse ky projekt do të realizohet apo jo. Ky është një bekim për vendin. Një investim prej 4 miliardë eurosh në një vend që ka një prodhim të brendshëm bruto prej rreth 27 miliardë eurosh flet vetë.

Sa i përket projektit që ka shkaktuar gjithë këtë reagim dhe debat në mbarë botën, bëhet fjalë për një pronë private. Nuk bëhet fjalë për toka publike që qeveria shqiptare po i jep apo po e shet vendin. Është një pronë private.

Është një shprehje interesi e bazuar në një marrëveshje private mes palëve private, në të cilën qeveria shqiptare nuk ka asnjë lidhje”, u shpreh Rama.