Bota e muzikës ndërkombëtare është përfshirë nga dhimbja pas lajmit për vdekjen e Talay Riley, kantautorit dhe producentit të njohur britanik, fitues i çmimit Grammy. Artisti, emri i vërtetë i të cilit ishte Mark Orabiyi, u nda nga jeta në moshën 35-vjeçare. Mediat britanike raportojnë se Riley u gjet pa shenja jete në një pronë në zonën e Silvertown, në lindje të Londrës. Sipas informacioneve paraprake nga Policia Metropolitane, ai kishte pësuar plagë të shumta me mjet prerës. Ekipet e emergjencës mbërritën menjëherë në vendngjarje, por nuk mundën t’i shpëtonin jetën.

Në lidhje me ngjarjen, autoritetet kanë bërë të ditur se një i ri rreth të 20-ave është transportuar në spital me lëndime serioze, ndërsa tre persona janë shoqëruar dhe arrestuar për t’u marrë në pyetje. Më pas, ata janë liruar ndërsa hetimet vijojnë. Familja e artistit reagoi përmes një deklarate prekëse, ku e përshkroi Talay Riley si një njeri të dashur dhe të veçantë për të gjithë ata që e njihnin.

“Ai solli gëzim, dashuri dhe energji pozitive kudo që shkoi. Kujtimi i tij do të mbetet gjithmonë i gjallë në zemrat tona”, thuhet në reagimin e familjarëve.Edhe vëllai i tij ndau një mesazh emocional në rrjetet sociale, duke e cilësuar humbjen si një goditje të rëndë dhe të vështirë për t’u besuar. Gjatë karrierës së tij, Talay Riley la gjurmë të rëndësishme në industrinë muzikore, duke bashkëpunuar me artistë të njohur botërorë si Britney Spears, Dua Lipa, Jessie J, Ellie Goulding dhe Chris Brown. Ai u vlerësua me një çmim Grammy për kontributin e tij në një nga projektet muzikore të artistes H.E.R., duke u renditur mes emrave të respektuar të skenës muzikore ndërkombëtare.