Kryetari i AAK-së, Ramush Haradinaj, ka marrë pjesë në hapjen e Festivalit Folklorik “T’i këndojmë lirisë”, që u mbajt në Çabiq të Klinës, vendlindjen e Heroit të Kosovës, Mujë Krasniqi. Me këtë rast, Haradinaj kujtoi figurën dhe kontributin e Mujë Krasniqit në luftën për çlirimin e Kosovës, duke e cilësuar atë si një nga luftëtarët që përmes pushkës dhe këngës i dha forcë idealit të lirisë. “Mujë Krasniqi i këndoi lirisë në frontet e luftës, duke u bërë lajmëtar i saj”, ka shkruar Haradinaj. Ai bëri të ditur se në këtë ngjarje ishte i shoqëruar nga babai i Mujës, Halil Krasniqi, kryetari i Klinës, Zenun Elezaj, si dhe bashkëluftëtarë e qytetarë që ndanë kujtime për jetën dhe veprën e heroit. Sipas Haradinajt, Mujë Krasniqi, së bashku me Beqir Gashin dhe luftëtarë të tjerë të Ushtrisë Çlirimtare të Kosovës, jo vetëm luftuan në vijat e frontit, por përmes këngës ngritën moralin e ushtarëve dhe forcuan besimin në fitore. Ai theksoi se figura e Mujë Krasniqit mbetet simbol i përkushtimit ndaj lirisë dhe frymëzim për ruajtjen e vlerave kombëtare. “Heroi që i këndoi lirisë në robëri mbetet frymëzim që vlerat tona kombëtare të jetojnë gjithmonë”, ka theksuar Haradinaj.