Policia e Kërçovës ka ngritur kallëzim penal ndaj A.L. (36) nga fshati Pllasnicë, nën dyshimin se ka kryer veprën penale “Dëmtim ose shkatërrim i një të mire të mbrojtur të trashëgimisë kulturore”, e paraparë me nenin 264 të Kodit Penal.
Sipas informacioneve të policisë, i dyshuari është kapur në flagrancë nga zyrtarët policorë teksa po dëmtonte një nga vagonët e trenit historik “Qiro”, i markës HENSCHEL SOHN CASSEL Nr. 1507, i prodhuar në vitin 1917. Treni ndodhet i ekspozuar në bulevardin “Çlirimi”, pranë stacionit hekurudhor në Kërçovë.
Nga Institucioni Kombëtar – Muzeu “Maqedonia Perëndimore në LNÇ” në Kërçovë është konfirmuar se treni paraqet eksponat muzeor me rëndësi të veçantë historike dhe gëzon status të mbrojtjes së trashëgimisë kulturore.
Rastin e bëri të ditur zëdhënësi i SPB Ohër, Stefan Dimoski, ndërsa ndaj të dyshuarit do të vazhdojnë procedurat e parapara ligjore.